रुपन्देहीमा कोरोना परीक्षण रोक

काठमाडौँ । रुपन्देहीको भैरहवास्थित प्रदेश जनस्वास्थ्य कार्यालयमा कोरोना परीक्षण रोकिएको छ  आरटिपिसीआर मेसिनमा प्रयोग हुने एक्सट्रक्सन किट सकिएकाले परीक्षण रोकिएको प्रयोगशालाका विशषज्ञ सुमन सापकोटाले बताउनुभयो ।

उहाँले भन्नुभयो, “शुरुमा २५० किट आएको थियो । सबै सकियो । राष्ट्रिय जनस्वास्थ्य प्रयोगशालाबाट पठाउने कुरा छ । आएपछि पुनः परीक्षण शुरु हुन्छ ।”
आरटिपिसीआर मेसिनमा आरएनए एक्सट्रक्सन किट र पिसिआर किट प्रयोग हुन्छ । उक्त प्रयोगशालामा शुरुमा पिसीआर मेसिनबाट परीक्षण गरिएको भए तापनि नेशनल प्याथ ल्याबले दिएको आरटिपिसीआर मेसिनमार्फत पछिल्लो समय जाँच गरिँदै आएको छ । यद्यपि संघीय कृषि तथा पशुपन्छी मन्त्रालयले दिएको आरटिपिसीआर मेसिन पनि प्राविधिक समस्याका कारण प्रयोग हुन सकेको छैन ।

किट अभावका कारण आइतबारदेखि कुनै पनि परीक्षण नभएको जनाइएको छ ।  अहिलेसम्म ३३७ नमूना परीक्षण गरिएको छ । हाल नमूना परीक्षणका लागि आएमा राष्ट्रिय जनस्वास्थ्य प्रयोगशालामा पठाउने गरिएको छ ।