भारतमा कोरोना संक्रमितको संख्या २५ हजार नजिक, ७ सय ७५ जनाको मृत्यु

एजेन्सी । भारतको स्वास्थ्य मन्त्रालयको तथ्यांक अनुसार अहिलेसम्म भारतमा कोरोनाबाट संक्रमित हुनेको संख्या २४ हजार ५ सय ३ पुगेको छ । भारतमा भेटिएका संक्रमितमध्ये १ सय १ जना विदेशी छन् ।

सबैभन्दा धेरै संक्रमित महाराष्ट्रमा देखिएको छ । महाराष्ट्रमा ६ हजार ८ सय १७ जनामा यो भाइरसको संक्रमण देखिएको छ । त्यस्तै गुजरातमा दुई हजार ८ सय १५ जनामा संक्रमण पुष्टि भएको छ । दिल्लीमा दुई हजार ५ सय १४ पुगेको छ ।

उत्तर प्रदेशमा अहिलेसम्म एक हजार ६ सय २१ जनामा भाइरसको संक्रमण पुष्टि भएको छ । बिहारमा २ सय २३ जनामा भाइरसको संक्रमण भेटिएको छ । भारतमा अहिलेसम्म पाँच हजार ६३ संक्रमित निको भएर घर फर्किसकेका छन् ।

भारतमा ७ सय ७५ जनाको कोरोना भाइरसको कारण मृत्यु भइसकेको छ । मृत्यु हुनेमध्ये सबैभन्दा धेरै महाराष्ट्रमा अहिलेसम्म ३ सय १ जनाको मृत्यु भइसकेको छ ।

गुजरातमा १ सय २७ जनाको मृत्यु भइसकेको छ भने मध्य प्रदेशमा मृत्यु हुनेको संख्या ९२ पुगेको छ । उत्तर प्रदेशमा अहिलेसम्म २५ जनाको कोरोना भाइरसको कारण मृत्यु भइसकेको छ भने बिहारमा दुईजनाको मृत्यु भएको छ ।