हसिनालाई बंगलादेश सुपुर्दगी गर्न मोदीलाई युनुसको आग्रह

काठमाडौं। भारतका प्रधानमन्त्री नरेन्द्र मोदी र बंगलादेशका अन्तरिम सरकारका प्रमुख सल्लाहकार मोहम्मद युनुसबीच अपदस्थ प्रधानमन्त्री शेख हसिनालाई बंगलादेश सुपुर्दगी गर्ने विषयमा छलफल भएको छ ।

टाइम्स अफ इन्डियाले भारतीय विदेश मन्त्रालयका प्रवक्ता रणधीर जैसवालको भनाइ उदृत गर्दै हसिनालाई बंगलादेश फिर्ता गर्ने विषयमा युनुसले चासो दिएको उल्लेख गरेको छ ।जैसवालका अनुसार, दुई नेताबीचको कुराकानीमा भारत-बंगलादेश सम्बन्धलाई थप बलियो बनाउने र आपसी हितका विभिन्न मुद्दामा छलफल भएको थियो । 

गत अगस्टमा बंगलादेशमा भएको जनआन्दोलनपछि देश छोडेर भारतमा शरण लिएकी हसिनामाथि बंगलादेशमा विभिन्न अभियोग लागेको छ । सोही अभियोगमा अनुसन्धान गर्न युनुसले भारतीय प्रधानमन्त्री मोदीसमक्ष हसिनाको सुपुर्दगीका विषयलाई मुख्य मुद्दा बनाएका हुन् ।

‘प्रधानमन्त्री मोदी र युनुसबीचको कुराकानी सकारात्मक र रचनात्मक रह्यो । दुवै नेताले आपसी सहयोग र क्षेत्रीय स्थायित्वमा जोड दिएका छन्’, जैसवालले एक पत्रकार सम्मेलनमा भने ।
 
उनले शेख हसिनाको सुपुर्दगीको मुद्दामा पनि छलफलमा रहेको र यो विषयमा भारतले आफ्नो कानूनी प्रक्रिया र दायित्वलाई ध्यानमा राखेर विचार गरिरहेको बताए । 

बंगलादेशले हसिनामाथि भ्रष्टाचार, दमन र जनआन्दोलनका क्रममा हिंसा गरेको आरोप लगाएको छ । युनुस नेतृत्वको अन्तरिम सरकारले उनलाई फिर्ता ल्याएर मुद्दा चलाउने घोषणा गरेको छ । 

तर, भारतले हालसम्म उनलाई शरणार्थीको रूपमा राखेको छ र सुपुर्दगीको मागलाई लिएर कुनै औपचारिक निर्णय सार्वजनिक गरेको छैन ।