नेपाल इन्भेस्टमेन्ट मेगा बैंकको ३८औं वार्षिक साधारणसभा सम्पन्न, नाफा ४ अर्ब ११ करोड

काठमाडौं।  नेपाल इन्भेस्टमेन्ट मेगा बैंक लिमिटेडको ३८औं वार्षिक साधारणसभा सम्पन्न भएको छ । राष्ट्रिय सभागृह प्रदर्शनी मार्ग, काठमाडौंमा सम्पन्न आर्थिक वर्ष २०८०/८१ को साधारणसभाले संस्थापक समूह तर्फबाट पृथ्वीबहादुर पाँडेसहित दिपंकर शाक्य उदय, प्रजन्य राजभण्डारी र मदनकुमार आचार्यलाई सञ्चालक समितिमा चयन गरेको छ।

यस्तै, सर्वसाधारण शेयरधनी समूहको तर्फबाट सञ्चालक समितिमा प्रतिनिधित्व गर्ने सञ्चालक पदको निर्वाचनमा कविकुमार टिवरेवाला र शालिकराम बेल्बासे निर्वाचित भएका बैंकले जनाएको छ ।आर्थिक वर्ष २०८०/८१ मा बैंक ४ अर्ब ११ करोड रुपैयाँ खुद मुनाफा आर्जन गर्न सफल भएको छ ।

आर्थिक वर्ष २०८०/८१ मा नेपाल इन्भेस्टमेन्ट मेगा बैंक  लिमिटेडको कुल निक्षेप ४६ अर्ब ५८ करोड रुपैयाँले वृद्धि भइ ४ खर्ब ७ अर्ब रुपैयाँ पुगेको छ ।

त्यसैगरी आर्थिक वर्ष २०८०/८१  को अन्त्यमा बैंकको कुल कर्जा तथा सापटी रकम ६ अर्ब १० करोड  रुपैयाँले वृद्धि भइ ३ खर्ब १८ अर्ब रुपैयाँ पुगेको छ ।

अघिल्लो आर्थिक वर्षको अन्त्यमा नेपाल इन्भेस्टमेन्ट मेगा बैंक लिमिटेडको कूल कर्जा तथा सापटी रकम ३ खर्ब १२ अर्ब रुपैयाँ रहेको थियो । यस बैंकको चुक्ता पूँजी ३४ अर्ब १३ करोड रुपैयाँ र कुल शेयरधनी कोश ६० अर्ब १७ करोड रुपैयाँ पुगेको छ ।

हाल बैंकले २७२ शाखा, २६६ एटीएम, १६ राजश्व संकलन काउन्टरसहित ६५ एक्स्टेन्सन काउन्टर र ६६ शाखारहित बैंकिङमार्फत ३२ लाखभन्दा बढी ग्राहकहरूलाई सेवा दिँदै आएको छ ।

गुणस्तरीय सेवा तथा सुविधा प्रदान गरेका कारण समीक्षा अवधिमा बैंकले अन्तर्राष्ट्रिय प्रकाशन– युरोमनीबाट 'बेस्ट बैंक २०२३' को उपाधि समेत प्राप्त गर्न सफल भएको छ ।