जडीबुटी प्रशोधन केन्द्र बस्तीबाट टाढा सार्न योजना बनाऔं : सोबिता गौतम

काठमाडौं । राष्ट्रिय स्वतन्त्र पार्टी (रास्वपा) सांसद सोबिता गौतमले जडीबुटी उत्पादन तथा प्रशोधन केन्द्र सार्नका लागि सरकारले योजना बनाउनुपर्ने बताएकी छिन् । आफ्नै निर्वाचन क्षेत्रमा अवस्थित उक्त केन्द्रमा गत १५ गते राजावादीहरूको प्रदर्शनपछि उग्र बनेको समूहले आगजनी गरेको थियो ।

आगजनीपछि ध्वस्त भएको उक्त केन्द्रको बिहीबार अवलोकनपछि उनले उपयुक्त स्थान हेरेर सरकारले केन्द्र सानुपर्ने बताएकी हुन् ।जडीबुटीमा रहेको उक्त केन्द्र रहेको स्थान सांसद गौतमको निर्वाचन क्षेत्र समेत हो ।

निर्वाचन क्षेत्रका युवाहरूले गौतमलाई केन्द्रको अवलोकन र छिटो सञ्चालनमा ल्याउनका लागि पहल गर्न आग्रह गरेका थिए ।सोही अनुसार सांसद गौतमले बिहीबार वनमन्त्री ऐनबहादुर शाहीलाई समेत लगेर केन्द्रको अवलोकन गराएकी छिन् ।

अवलोकनको क्रममा सांसद गौतमले आगलागीबाट २८ करोडको क्षति देखिएको भन्दै आगो लगाउनेलाई कानुनी दायरामा आउनुपर्ने र सरकारले ल्याउनुपर्ने बताइन् ।

‘जतिबेला स्थापना भयो, खुला ठाउँ थियो, अब घना बस्ती भइसकेकाले यहाँ उपयुक्त छैन भन्ने महसुस भएको छ । सरकारले उपयुक्त स्थानमा सार्नको लागि योजना बनाउनुपर्छ,’ उनले भनिन् ।

प्रशोधन केन्द्रकी महाप्रबन्धक संगीता यादवलगायत पदाधिकारीले आगलागीबाट क्षति भएको भग्नावशेषको अवलोकन गराउँदै क्षतिबारे जानकारी गराएका थिए ।निरीक्षणपछि वनमन्त्री ठकुरीले छिटोभन्दा छिटो सञ्चालनमा लागि गृहकार्य भइरहेको बताए ।‘प्राविधिक र विज्ञ राखेर छलफल गरिरहेका छौं । १० करोड भयो भने अस्थायी सञ्चालन हुन्छ भन्ने छ । क्याविनेटमा छलफल भइसकेको छ । चाँडै रकम उपलब्ध हुन्छ,’ उनले भने ।

प्रशोधन केन्द्रकी महाप्रबन्धक यादवले नयाँ उत्पादनको तयारी गरिरहेका बेला आगो लाग्दा ठूलो क्षति भएको बताइन् । उनका अनुसार उद्योगको दुइटा भवन र १३ वटा गाडी जलेर क्षति भएको छ । प्रशोधन केन्द्रका भग्नावशेष बनेको छ । गाडीहरू जलेका छन् । करोडौंको क्षति भएको छ ।