चितुवाले आक्रमण गर्दा बालकको मृत्यु

बर्दिया । बर्दियामा चितुवाको आक्रमणबाट एक बालकको मृत्यु भएको छ। 

बर्दियाको मधुवन नगरपालिका-७ भाट चोकस्थित मनोज कँडेलको घरमा चितुवाले आक्रमण गर्दा अढाई वर्षीय रिहान चलाउनेको मृत्यु भएको जिल्ला प्रहरी कार्यालय बर्दियाले जनाएको छ। रिहान मनोजका भान्जा हुन्। 

आँगनमा खेलिरहेका बालकलाई चितुवाले आक्रमण गरेर बेपत्ता बनाएपछि प्रहरी र स्थानीयले खोजी सुरु गरेका थिए। 

रचना बाँकेको राप्तीसोनारी गाउँपालिका-५ बाट माइत गएको बेला घटना भएको प्रहरीले जनाएको छ। चितुवाले आक्रमण गर्दा बालकको घाँटी र टाउकोको पछाडिको भागमा गहिरो घाउ देखिएको छ। 

गएको माघ २५ गते पनि सोही स्थानमा चितुवाले आक्रमण गर्दा ५१ वर्षीया जुनाकुमारी लामिछानेको मृत्यु भएको थियो। गाउँमा चितुवा आतंक बढेपछि स्थानीय त्रसित भएका छन्।