गाजामा इजरायली सेनाको आक्रमण तीव्र

तेल अभिभ । आइतबारदेखि इजरायल र प्यालेष्टिनी सशस्त्र समूह हमासबिच गाजामा युद्धविराम सम्झौता लागू हुँदै थियो । भनेको समयमा युद्धविराम सुरु त भएन, यसबिच इजरायली सेनाले आक्रमण तीव्र बनाउँदा गाजामा धमाधम मान्छे मरिरहेको खबर आइरहेको छ ।

युद्धविराम लागू हुनुपर्ने समयदेखि पहिलो एक घन्टाभित्र इजरायली सेनाले गरेको आक्रमणमा परेर आठ जनाको मृत्यु भएको छ । गाजा हमासले चलाइरहेको नागरिक रक्षा एजेन्सीका प्रवक्ताले यसको जानकारी दिएका हुन् ।

गाजा सहरमा पाँच जना मारिएको महमुद बसलले भनेका छन् । अरू तीन जना सहरको उत्तरतिर भएको आक्रमणमा मारिएका हुन् । यी आक्रमणमा परेर २५ जना घाइते भएको उनले बताएका छन् ।गाजामा धुवाँको ठुला मुस्लो उठिरहेको भिडियोहरू सार्वजनिक भइरहेका छन् । यसैबिच इजरायली सेनाले एक इजरायली सेनाको शव फेला पारेको छ ।

स्टाफ सर्जेन्ट ओरन शल सन् २०१४ मा गाजा युद्धको क्रममा मारिएको र उनको शव हमासले राखिराखेको बताइएको छ । हमासले गाजामा आइतबार देखि लागू हुने भनिएको नयाँ युद्ध विरामको सम्झौता अनुसार शलको शव बुझाउन थालेको ठानिएको छ । 

हमासको कब्जामा यतिबेला सन् २०२३ को अक्टोबरमा इजरायलमाथि हमला गर्नु अघि बन्धक बनाएका तीन जना इजरायली बन्दी पनि छन् । यीमध्ये एक जना सिपाही हदल गोल्डिन भएको र अन्य दुई जना भने आम इजरायली हुन् । गोल्डिन २०१४ को गाजा युद्धमा मारिएका थिए ।