उपसभामुखलाई हटाउन खोज्नु लोकतन्त्रलाई कमजोर बनाउनु हो : सांसद पौडेल

काठमाडौँ । सत्तापक्ष सांसदहरूले उपसभामुख इन्दिरा रानाको राजीनामा मागेको विषयमा माओवादी केन्द्रले खबरदारी गरेको छ । मंगलबार बसेको प्रतिनिधि सभा बैठकको विशेष समयमा बोल्दै माओवादी केन्द्रका सांसद देवेन्द्र पौडेलले उपसभामुखलाई हटाउन खोज्नु लोकतन्त्रलाई कमजोर बनाउने काम भएको बताए ।

उनले भने,‘केही अनलाइन समाचारले लेखेका थिए तर यो हलमा पसेपछि उपसभामुख हटाउने अभियान चलेको थाहा पाएँ । लोकतन्त्र भनेको समझदारी हो, विश्वास हो, सहकार्यको संस्कृति हो । विपक्षी दलमा पनि कैयौँ पक्षमा सरकारमा रहेकाहरूले सहमति र सहकार्य गरेर अगाडि बढ्ने कुराहरू नै लोकतन्त्रको पक्ष हो ।

एकजना महिला, जनजाति, सहमतिको आधारमा आउनुभएको, सामाजिक क्षेत्रमा काम गर्नुभएको उपसभामुखलाई बलियो भनिएको दुई तिहाइको सरकारले हटाउने भनेको कदममा पुग्ने कुरा निकै दुखदायी छ । यसले लोकतन्त्र अगाडि बढ्न सक्दैन । यसले लोकतन्त्रको सुदृढ र सहकार्य अगाडि बढ्दैन ।

उनले यस्तो विषयमा कुनै कदम नचाल्न आग्रह गर्दै सरकारलाई खबरदारी गर्ने बताए ।सांसद पौडेलले भने,‘प्रश्न उठाउँदैमा हटाउने हो भने दशौँ मन्त्रीमाथि प्रश्न उठेको छ । राजीनामा दिन तयार हुनुहुन्छ ? लाउडामा प्रश्न उठ्यो, भुटानी शरणार्थीमा प्रश्न उठ्यो, बालुवाटार जग्गा प्रकरणमा प्रश्न उठ्यो, गिरीबन्दु टि–स्टेटमा प्रश्न उठ्यो ।

राजीनामा दिन तयार हुनुहुन्छ ?’उनले यी सबै विषयमा छानबिन गर्न आग्रह गर्दै सहमतिबाट उपसभामुखलाई चारैतिरबाट प्रहार गर्ने भन्दै प्रश्न उठाए ।