सोल । दक्षिण कोरियाको लिथियम ब्याट्री बनाउने कम्पनी एरिसेलका प्रमुख कार्यकारी अधिकृतलाई पक्राउ गरिएको छ । जुनमा २३ जनाको ज्यान जाने गरी सो कारखानामा भएको भयानक आगलागीको मामिलामा प्रहरीहरूले पार्क सून–क्वानलाई पक्राउ गरेका हुन् ।
यस घटनामा अरू ९ जना घाइते भएका थिए । अदालतले बुधबार पार्कको नाममा पक्राउ पुर्जीलाई मञ्जुरी दिएको थियो ।कम्पनीको व्यवस्थापनले कार्यस्थलको सुरक्षा मापदण्ड उल्लङ्घन गरेको आशङ्का गरिएको अनुसन्धानकर्ताहरूले बताएका छन् । यो आगलागीको घटनामा दक्षिण कोरियाको कारखानामा हालैका वर्षहरूमा भएको सबैभन्दा खराब आगलागी थियो ।
एरिसेलको माउ कम्पनी एस–कनेक्टले यस मामिलामा बीबीसीले सोधेको प्रश्नको तत्कालै जवाफ नदिएको बताइएको छ । आगलागीको घटना लगत्तै पार्कले माफीनामा जारी गरेका थिए । सो घटनाको सबै जिम्मेवारी लिँदै उनले मृतक र तिनका परिवारलाई सम्भव भएसम्म सबै तवरले सहायता उपलब्ध गराउने पनि उनले सो माफीनामामा भनेका थिए ।
प्रहरीले गरेको छानबिनको क्रममा कारखानामा प्रोडक्शन डेडलाइन पूरा गर्न भ्यानभ्याइ भएको पत्ता लागेको थियो । कारखानामा ब्याट्रीमा समस्याको स्तर पहिचान्न नसकेको अनि ब्याट्री जस्तो वस्तुको व्यवस्थापनमा अदक्ष कर्मचारीलाई भर्ना गरेको लगायत कयौँ सुरक्षा चूक भेटिएको अनुसन्धानकर्ताहरूले भनेका छन् । सेनासँग सम्बन्धित करारमा गुणस्तर निगरानीमा पनि ठगी गरेको आरोप पनि एरिसेलमाथि लागेको बताइएको छ ।
जुन २४ मा कयौँ ब्याट्री सेल पड्किँदा कारखानामा भयानक आगो लागेको थियो । घटनाको समयमा कारखानाको दोस्रो तलामा निरीक्षण र प्याक गरेर झन्डै ३५ हजार वटा ब्याट्री राखिएको थियो । लिथियमका कारण आगो लाग्दा पानीले निभाउन सकिन्न ।
अग्नि नियन्त्रकहरूले आगो निभाउन सुख्खा बालुवाको प्रयोग गर्नु परेको थियो । यसका कारण आगो नियन्त्रणमा आउन कयौँ घण्टा लागेको थियो । यस घटनामा मर्ने अधिकांश चीन र लाओ सलगायत देशबाट काम गर्न आएका विदेशी कामदार थिए । दक्षिण कोरिया लिथियम ब्याट्रीको सबैभन्दा ठुलो निर्माता हो ।
प्रतिक्रिया दिनुहोस
सफल खबर संवाददाता
विहीबार, १३ भदौ २०८१, १२ : ४५
लेखकबाट थप
सम्बन्धित समाचारहरु
दक्षिण कोरियाको जङ्गलमा भीषण आगलागी, २४ जनाको मृत्यु
दक्षिण कोरियाका प्रधानमन्त्री हानको महाअभियोग खारेज
महाभियोग लागेका दक्षिण कोरियाली राष्ट्रपति युन रिहा
एक दशकपछि दक्षिण कोरियाको जन्मदर बढ्यो
दक्षिण कोरिया बन्दरगाह शहर आगलागी : मृत्यु हुनेको संख्या ६ पुग्याे
दक्षिण कोरियाको बन्दरगाह सहरमा आगलागी, चार जनाको मृत्यु