बागमतीका ७१ हजार ९ सय पशुलाई लगाइयो खोप

हेटौंडा। लम्पी स्किनविरुद्धको सप्ताहव्यापी खोप कार्यक्रमअन्तर्गत बागमती प्रदेशमा ७१ हजार नौ सय बढी पशुलाई खोप लगाइएको छ । प्रदेश सरकारको कृषि तथा पशुपक्षी विकास मन्त्रालयले गत साउन २४ गतेदेखि ३२ गतेसम्म खोप अभियानमा सञ्चालन गरेको थियो ।

अभियानमा प्रदेशका विभिन्न जिल्लाका ७१ हजार नौ सय ८७ पुशचौपायालाई खोप लगाइएको मन्त्रालयका पशुपक्षी विकास महाशाखाका पशु सेवा अधिकृत डा. सन्तोष अधिकारीले जानकारी दिए ।

उनका अनुसार सप्ताहव्यापी अभियानका क्रममा सबैभन्दा बढी चितवनमा १० हजार दुई सय १९ र सबैभन्दा कम सिन्धुपाल्चोकमा एक हजार तीन सय दुई पशुमा लम्पी स्किनविरुद्धको खोप लगाइएको हो ।

चालू आर्थिक वर्षमा ७६ हजार दुई सय ७५ पशुचौपायालाई लम्पी स्किन विरुद्धको खोप लगाउने लक्ष्य रहेको जनाउँदै डा. अधिकारीले अभियानको शुरूमा नै ७१ हजार नौ सय ८७ मा खोप लगाइएको बताए ।