युरो कप : स्पेन र जर्मनीको भिडन्त पक्का

काठमाडौँ । एक गोलले पछि परेको स्थिति उल्टाउँदै स्पेन युरो २०२४ को क्वार्टरफाइनलमा प्रवेश गरेको छ । अन्तिम १६ को खेलमा स्पेनले नवप्रवेशी जर्जियालाई ४–१ गोलले हराएको हो ।

खेलमा रोबिनले नोरमान्डको आत्मघाती गोलको मद्दतले जर्जियाले १८ औँ मिनेटमा अग्रता लिएको थियो । तर, ३९ औँ मिनेटमा रोड्रीले स्पेनका लागि बराबरी गोल फर्काए ।

दोस्रो हाफमा भने स्पेनले गोलको वर्षा नै गर्‍यो । ५१ औँ मिनेटमा फाबियन रुइजले टोलीलाई अग्रता दिलाए भने ७५ औँ मिनेटमा निको विलियम्सले अर्को गोल थपे । ८३ औँ मिनेटमा ड्यानी ओल्मोले गोल गर्दै टोलीलाई शानदार जित दिलाए ।

योसँगै स्पेन क्वार्टरफाइनलमा प्रवेश गर्ने चौथो टोली बनेको छ । अब स्पेनले अन्तिम ८ मा आयोजक जर्मनीको सामना गर्नेछ ।