देउवाले बोलाए पदाधिकारी र सिनियर नेताको बैठक

काठमाडौं। नेपाली कांग्रेसका सभापति शेरबहादुर देउवाले पदाधिकारी, पूर्व पदाधिकारी र सिनियर नेताको बैठक बोलाएका छन् ।आन्तरिक संगठन र समसामयिक राजनीतिक विषयमा छलफल गर्न बैठक बोलाइएको कांग्रेस केन्द्रीय कार्यालयका मुख्य सचिव कृष्णप्रसाद पौडेलले जानकारी दिए ।

‘असार १५ गतेदेखि कांग्रेसका केही भ्रातृ संस्थाको म्याद सकिँदै छ । यसैले यी संस्थाको विषयमा अब कसरी अगाडि बढ्ने, विभाग गठन र अरु संरचनालाई पूर्णता दिने विषयमा पनि छलफल गर्न पदाधिकारी, पूर्व पदाधिकारी र सिनियर नेताको बैठक बोलाइएको हो,’ पौडेलले लोकान्तरसँग भने, ‘यी बाहेक समसामयिक राजनीतिक विषयमा पनि छलफल हुनेछ ।’

बैठक सोमबार दिउँसो ३ बजे सभापति देउवाको बूढानीलकण्ठस्थित निवासमा बस्नेछ ।देउवाले शनिबार मात्रै एमाले अध्यक्ष केपी शर्मा ओलीसँग तीन घण्टा लामो छलफल गरेका थिए ।

छलफलमा कांग्रेस र एमाले मिलेर जानुपर्ने विषयमा संवाद प्रारम्भ भएको नेताहरूले बताएका छन् ।यही बेला देउवाले पदाधिकारी र पूर्व पदाधिकारीको बैठक बोलाएर छलफल गर्न खोज्नुलाई अर्थपूर्ण रूपमा हेरिएको छ ।