लमजुङ । लमजुङमा असार अगावै बर्खे धान रोप्न सुरु भएको छ।
पानी पर्न थालेसँगै एक हप्ता अघिदेखि लमजुङमा धानको रोपाइँ सुरु भएको कृषि ज्ञान केन्द्रले जनाएको छ।
केन्द्रका सूचना अधिकारी तथा बाली संरक्षण अधिकृत विजयराज पौडेलका अनुसार जिल्लाको राइनास नगरपालिका, मध्यनेपाल नगरपालिका र मर्स्याङ्दी गाउँपालिकाको बेँसीका फाँटमा धान रोप्न सुरु गरिएको हो । यसबाहेक पनि जिल्लाका अधिकांश ठाउँमा धान रोपाइँको तयारी भइरहेको उनको भनाइ छ।
मर्स्याङ्दी वडा नं ५ घेर्मुका किसानले केही दिनअघिदेखि घेर्मुफाँटमा धान रोप्न सुरु गरेको किसान काम सार्की गुरुङले बताए। लमजुङमै सबैभन्दा पहिले धान रोप्ने कार्य सुरु गरिने ठाउँ भनेर घेर्मुलाई चिनिन्छ। चिसो ठाउँ भएकाले र प्रशस्त पानीको सुविधा भएकाले धान रोपाइँ सुरु गरेको स्थानीय बबिता घलेले बताइन्।
सो वडाका वडाध्यक्ष लेखमान गुरुङले वडाका फाँटहरुमा केही दिनअघिदेखि धमाधम धान रोपाइँ भइरहेको बताइन्।विगतका वर्षमा ‘हाइब्रिड’ धान धेरै लगाउने गरे पनि गत वर्षदेखि स्थानीय जातको धानलार्ई प्राथमिकतामा दिँदै स्थानीय जातको धान घेर्मुफाँटमा लगाउन थालेको किसानहरुले बताएका छन्।
जिल्लाका ठूला–ठूला फाँट राइनासटार, धमिलिकुवा, भलाखर्क, चक्रतीर्थ, रामचोकबेँसी, भोर्लेटार, दुईपिप्ले, सोतीपसल, परेवाडाँडा, सुन्दरबजार, सत्रसयलगायत स्थानमा रोपाइँ हुने तयारीमा रहेको किसानले बताएका छन्।
किसानले रामधान, सुनौलो सुगन्ध, सुख्या–२, सावित्री, जेठोबुढो, एक्ले, लोकतन्त्रलगायत उन्नत जातका धानका साथै लोकनाथ, गोरखनाथ, युएस–३१२, मकवानपुर, वर्षे ३००४, मनसुली लगायतका हाइब्रिड जातका धान लगाउँदै आएका छन्।
कृषि ज्ञान केन्द्रका अनुसार जिल्लामा करिब १० हजार हेक्टर क्षेत्रफल जमिनमा धानखेती गरिँदै आएको छ। किसानहरुले पानी कम हुने ठाउँमा भने सुक्खा–१, सुक्खा–२, सुक्खा–३ लगाउने गरेका छन्। गत वर्षको तुलनामा यस वर्ष धान रोपाइँ छिटो सुरु भएको र पानी पर्याप्त भएमा चाँडै रोपाइँ सकिने केन्द्रले जनाएको छ।
प्रतिक्रिया दिनुहोस
सफल खबर संवाददाता
मंगलबार, २९ जेठ २०८१, ०७ : ३६
लेखकबाट थप
सम्बन्धित समाचारहरु
धानको मूल्य बर्सेनि वृद्धि
नवलपरासीका किसानलाई चैतेधान भित्र्याउन भ्याइनभ्याइ
भन्सार छलेर ल्याएको ३४ क्विन्टल धानसहित रौतहटबाट एक व्यक्ति पक्राउ
सरकारले अनुदान दिन थालेपछि बढ्यो धान उत्पादन
बारामा एक वर्षमा दुई लाख ७१ हजार मेट्रिक टन धान उत्पादन
सरकारले तोक्यो चैते धानको समर्थन मूल्य