सेना दिवसका अवसरमा धनगढीमा सैनिक प्रदर्शनी हुने, प्रवेश निःशुल्क

धनगढी। महाशिवरात्रि एवं २६१ औं सेना दिवसको अवसरमा नेपाली सेनाले कैलालीको धनगढीमा तीन दिने विविध सैनिक प्रदर्शनी अवलोकन तथा ‘युनिटी रन’ आयोजना गर्ने भएको छ ।

यही फागुन २६ देखि २८ गतेसम्म नेपाली सेनाको सुदूरपश्चिम पृतनाले धनगढीस्थित कवर्डहल खेल मैदानमा आयोजना गर्ने प्रदर्शनीमा सर्वसाधारणलाई सेनाको विविध पक्षबारे जानकारी गराइने छ ।

सो क्रममा इतिहासदेखि हालसम्मका सेनासम्बन्धी गतिविधि तथा हातहतियार, उपकरण, पोशाकलगायत विविध विषयवस्तु प्रदर्शनमा रहने सेनाले जनाएको छ ।निःशुल्क प्रवेश सुविधा मिलाइएको प्रदर्शनीमा सर्वसाधारण, विद्यार्थीलगायत सबैले अवलोकन गर्ने अपेक्षा गरिएको छ ।

युनिटी रनमा सहभागी हुनेहरूले यहाँ रहेको सैनिक गण तथा गुल्महरूमा नाम दर्ता गर्ने प्रबन्ध मिलाइएको छ । कञ्चनपुरबाट सहभागी हुने खेलाडी तथा सर्वसाधारणहरूको नाम दर्ता श्रीदल गुल्म भगतपुर ब्यारेकमा गर्न सकिने सेनाले जनाएको छ ।

गत वर्ष पनि सेना दिवसका अवसरमा सुदूरपश्चिममा सैनिक प्रदर्शनीका साथै खेलकुदलगायतका कार्यक्रम आयोजना गरेको थियो ।