तीन महिनापछि रेसुङ्गामा फेरि उडान शुरू

बुटवल। प्रतिकूल मौषमको कारण देखाउँदै तीन महिनादेखि रोकिएको गुल्मीको रेसुङ्गा विमानस्थलबाट फेरि उडान शुरू भएको छ । शुक्रबार नेपाल एयरलाइन्सको विमानले उडान भरेको हो । नेपाल एयरलाइन्स रेसुङगा विमानस्थलका स्टेसन इन्चार्ज सुमन थापाले अबदेखि मौषम हेरेर हरेक हप्ताको मंगलवार र शुक्रवार उडान हुने जानकारी दिए । 

गत वैशाखको अन्तिम सातादेखि व्यावसायिक उडान शुरू गरेपनि मौसम खराबीका कारण उडान हुन सकेको थिएन । शुक्रवार काठमाडौंबाट रेसुङ्गाका लागि उडान भर्दा ११ जना यात्रु सवार थिए । रेसुङ्गाबाट काठमाडौंका लागि भने मात्र तीनजना यात्रु थिए । यसअघि यो विमानस्थलमा अहिलेभन्दा धेरै यात्रु हुन्थे । मौसम खराबीले पटक–पटक विमान उडान नभएपछि यात्रुमा विश्वास घट्दै गएको बताइएको छ ।

सरकारले भ्याट लगाएसँगै विमानको दुईसय रुपैयाँले भाडादर वृद्धि भएको छ । रेसुङ्गादेखि काठमाडौं ७ हजार ८० रुपैयाँ र काठमाडौंदेखि रेसुङ्गा ७ हजार २८०  रुपैयाँ भाडादर कायम गरिएको थापाले जानकारी दिए । रेसुङ्गा विमानस्थलमा विमान उडानका लागि बिहानीको समय उपयुक्त मानिएको छ ।

शुक्रवारदेखि नियमित उडानको खबरले आफूहरूमा उत्सा छाएको गुल्मीबासीले बताएका छन् । तर, पहाडी जिल्लाका विमानस्थलले नियमति यात्रु पाउन नसक्दा चल्दै बन्द हुँदैको अवस्था देखिएको सरोकारवालाहरूको भनाइ छ ।