बाढी पहिरोमा परी २५ जना बेपत्ता

काठमाडौ । कोशी प्रदेशका विभिन्न स्थानमा गएको बाढी पहिरोमा परेर २५ जना बेपत्ता भएका छन् । संखुवासभा, पाँचथर र ताप्लेजुङमा गएको बाढी पहिरोमा परेर २५ जना बेपत्ता भएका हुन् । 

सङ्खुवासभाको हेँवा खोलामा आएको बाढीले बगाएर एक जनाको मृत्यु हुनुको साथै १६ जना बेपत्ता भएका छन् । मृत्यु हुनेको सनाखत हुन सकेको छैन । जिल्लाको पाँचखपन नगरपालिका ५ मा बाढीले बगाएर ल्याएको अवस्थामा शव फेला परेको प्रहरीले जनाएको छ ।
यस्तै बाढीले चैनपुर ४ मा निर्माणाधीन सुपर हेँवा हाइड्रोमा क्षति पुगेको छ ।

उक्त परियोजनामा काम गर्ने १६ मजदुरहरू सम्पर्कविहीन रहेको जनाइएको छ । सम्पर्क विहीन भएकाहरूको अवस्था अज्ञात छ ।

यसैगरी पाँचथरको फिदिम स्थित हेवा खोलामा आएको बाढीका कारण ५ जना बेपत्ता भएका छन् । गएराति आएको बाढीले १० वटा घर बगाएको पाँचथरका डिएसपी हरि खतिवडाले बताए ।

ताप्लेजुङको सिदिङ्वा गाउँपालिकास्थित मेहेलेमा पनि पहिरोले घर बगाउँदा एकै परिवारका तीन जना बेपत्ता छन् । स्थानीय कमल कडरियाका अनुसार पहिराले यादव बुढाथोकीको घर बगाउँदा यादवकी श्रीमती भगीमाया, बुहारी सन्ध्या र नाति प्रज्वल बेपत्ता छन् ।