जनताले विकास चाहेका छन्, त्यसैले एमालेको जित सुनिश्चित छ : पुरुषोत्तम पौडेल

बारा । नेकपा एमालेका उम्मेदवार पुरुषोत्तम पौडेलले बारा-२ का जनताले विकास हेर्न चाहेका कारण वैशाख १० गतेको उपनिर्वाचनमा एमालेलाई विजयी गराउने बताएका छन् ।चुनावी अभियानका क्रममा पचरौता पुगेका उम्मेदवार पौडेलले संचारकर्मीसँग प्रतिक्रिया दिँदै एमालेलाई जिताउन बारा २ का आम मतदाता आतुर रहेको सुनाए ।एमालेले नेतृत्व गर्न नपाएका कारण बारा-२ विकासमा पछि परेको नेता पौडेलको भनाई थियो ।

सत्ता र स्वार्थका लागि मतदाताको भावनासँग खेल्नेहरूलाई जनताले अब चिनिसकेको भन्दै उम्मेदवार पौडेलले बारा २ को मुहार फेर्नका लागि पनि एमालेको आवश्यकता रहेको दाबी गरे ।घरदैलोका क्रममा पचरौता, महागढीमाई, करैयामाई, देवताल, सुवर्ण र कोल्हबी क्षेत्र घुम्ने क्रममा जनताले एमालेको पक्षमा खुलेर मत मागिरहेको उम्मेदवार पौडेलले जनाए । वैशाख १० गते यस क्षेत्रले एमालेलाई जनप्रतिनिधिका रूपमा पाउने र विकासका कामले गति लिने उम्मेदवार पौडेलले बताए ।