न्यायाधीशलाई २ करोड रुपैयाँको अफर गर्ने अधिवक्ता पोखरेललाई सातदिने स्पष्टीकरण

काठमाडौं । नेपाल कानुन व्यवसायी परिषद्ले न्यायाधीशलाई २ करोड रुपैयाँको अफर गर्ने अधिवक्ता रुद्रप्रसाद पोखरेललाई सातदिने स्पष्टीकरण सोधेको छ ।

काठमाडौं जिल्ला अदालतका न्यायाधीश राजकुमार कोइरालालाई घुस प्रलोभन देखाएका अधिवक्ता पोखरेललाई साथ दिनभित्र जवाफ पेस गर्न परिषद्ले आज सार्वजनिक सूचना निकालेको हो । 

सात दिनभित्र जवाफ पेस नगरे कानुन बमोजिम कारबाही गरिने चेतावनी पनि परिषद्ले दिएको छ । सहकारी ठगी मुद्दा खेपिरहेका इच्छाराज तामाङलाई १० करोड धरौटीमा छुटाउनेबारे न्यायाधीश कोइराला र अधिवक्ता पोखरेलबीच भएको मोलमोलाइको अडियो सार्वजनिक भएको थियो ।

सार्वजनिक अडियोमा पोखरेलले ‘मुद्दा मिले २ करोड रुपैयाँ तपाईंको भागमा पर्छ’ भनेर प्रलोभन दिइरहेको सुनिन्छ । उक्त अडियोमा अधिवक्ता पोखरेलले ‘माथिबाट’ भन्न लगाउने भन्दै न्यायाधीश कोइरालालाई आश्वस्त पार्न खोजेका छन् ।