प्राकृतिक विपद्‌बाट ४ को मृत्यु, ४ जना घाइते

देशभरि चट्याङ, पहिरो, हावाहुरी, आगलागीलगायत घटनाबाट ४ जनाको मृत्यु भएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार मंगलबार बिहान १० बजेदेखि आज (बुधबार) बिहान १० बजेसम्ममा ४ जना घाइते भएका छन्।

काभ्रेपलाञ्चोक जिल्लाको महाभारत गाँउपालिका-७ स्थित ठूलोबासपुर केराबारी बस्ने १६ वर्षकी एक किशोरीको चट्याङ्गका कारण मृत्यु भएको छ। मकवानपुर राक्सीराङ गाउँपालिका-८ गोर्याङ बस्ने ६५ वर्षका एक पुरुष चट्याङ्गकाे झट्का लागेर सिकिस्त भएका छन्। उनको उपचारका लागि मनहरी अस्पताल लगिएको पनि उनको मृत्यु भयो। 

पाल्पाका ६१ वर्षीय पुरुष पानीको नहर खन्ने क्रममा अचानक माथिबाट ढुङ्गासहितको पहिरो खस्दा मृत्यु भएको छ। महोत्तरी जलेश्वर नगरपालिका-८ रतवारा बस्ने वर्ष ४५ की अर्का एक महिलालाई बसिरहेको अवस्थामा हावाहुरीले गोठमा छाएको जस्ता उडाउँदा जस्ताले निधारमा काटेर उपचारका लागि लैजाने क्रममा बाटोमै मृत्यु भएको प्राधिकरणले जनाएको छ।