साउदी पुरानै लयमा, सबै विमानस्थल पूर्ण क्षमतामा सञ्चालन

साउदी । नेपालीहरूको प्रमुख श्रम गन्तव्य रहेको साउदी अरब कोरोना संक्रमण कम हुँदै गएपछि पुरानै लयमा फर्किएको छ ।

नागरिक उड्डयन प्राधिकरणले आइतबारदेखि देशका सबै विमानस्थलहरू पूर्ण क्षमतामा उडान सञ्चालन भएको जनाएको छ । जहाँ यात्रुहरूको कोरोना खोप (भ्याक्सिन)को रेकर्ड एउटा एपमार्फत जाँच गरिनेछ ।

साथै कोरोना संक्रमण अवधिमा रद्द भएका उडान र रद्द भएका टिकटहरूका लागि यात्रुले चाहे बमोजिम बिना कुनै अतिरिक्त शुल्कमा समय परिवर्तन गर्न सक्ने अर्को सर्कुलर जारी गरेको जनाएको छ ।

यसैगरी, पूर्ण खोप (भ्याक्सिन) लगाएकाहरूले बाहिर मास्क लगाउने र सामाजिक दूरी पनि पालना गर्नु नपर्ने भएको छ ।

पूर्ण खोप लगाएका व्यक्तिहरूको लागि विवाह हल, रेस्टुरेन्ट र यातायातका साधनमा शारीरिक दूरी नराखी पूर्ण क्षमतामा सञ्चालन गर्न अनुमति दिइने साउदीको आन्तरिक मन्त्रालयले जनाएको छ ।

तर भित्र ठाउँहरुमा रहँदा मास्क तथा सामाजिक दूरी लगायतका सावधानी अपनाउनै पर्ने र कानुन उलङ्घन गरे जरिवाना हुने नियम यथावत रहेको जनाइएको छ । साउदी सरकारको यो निर्णयसँगै त्यहाँ कार्यरत नेपाली श्रमिकहरूलाई पनि राहत मिलेको छ ।

अब बिना मास्क बाहिर हिड्डुल गर्न पाउने भएका छन् । साउदीले कोरोना भाइरसको फैलावट रोक्न गत वर्ष २७ फेब्रुअरी २०२० देखि तीर्थयात्रीहरूमा अस्थायी प्रतिबन्ध लगाएको थियो ।

त्यति गर्दा पनि संक्रमण कम नभएपछि कर्फ्यु लगाएर सार्वजनिक जीवनका सबै गतिविधिहरू बन्द गरी राष्ट्रिय तथा अन्तर्राष्ट्रिय उडान सेवाहरू बन्द गरेको थियो । साउदी अरबमा करिब चार लाखको हाराहारीमा नेपाली कामदार कार्यरत रहेको अनुमान छ ।