माथिल्लो तामाकोशी वैशाखभित्र परीक्षण गरिने

काठमाडौं । आन्तरिक परीक्षणको चरणमा रहेको माथिल्लो तामाकोसी  जलविद्युत्  आयोजनाको  मुख्य  सुरुङ  पेनस्टकमा  वैशाखको  दोस्रो सातादेखि  पानी  हालेर  परीक्षण  गरिने  भएको  छ ।अहिले  बाँध,  सुरुङ,  प्रसारण लाइन,  सबस्टेसनलगायतका  संरचनाका  सिभिल  र  मेकानिकलतर्फका  सानातिना काम भइरहेको आयोजनाले जनाएको छ।

 स्वदेशी  लगानीमा  निर्माणाधीन  ४५६  मेगावाटको  आयोजनाको  हाल हाइड्रोमेकानिकलतर्फका  केही  गेट  र  पेनस्टक  पाइपसँग  सम्बन्धित  केही कङ्क्रिटिङको  काम  मात्रै  बाँकी  छ ।  

बाँकी  रहेका  सानातिना  काम  सम्पन्न  गरी आगामी वैशाखको दोस्रो हप्ताबाट पेनस्टक र मुख्य सुरुङमा पानी हाली पेनस्टक, मुख्य सुरुङ, सर्ज स्याफ्ट, सर्ज सुरुङ, पेनस्टक पाइपजस्ता संवेदनशील संरचना तथा  गेट,  म्यानहोल  र  भल्भहरूको  प्राविधिक  परीक्षण  गर्ने  तय  भएको  नेपाल विद्युत्  प्राधिकरणका  प्रमुख  कार्यकारी  निर्देशक  हितेन्द्रदेव  शाक्यले  जानकारी दिए । गोरखापत्रमा खबर छ ।