गोंगबु हत्या प्रकरण : ‘आरोपित महिलाले स्वीकारिन्, मैले नै हत्या गरेको हो’

काठमाडौँ । गोंगबुमा विभत्स हत्या प्रकरणमा चितवनबाट पक्राउ परेकी एक महिलालाई मंगलबार बिहान काठमाडौं ल्याइएको छ । रोल्पा स्थायी घर भई दाङ बसाइँसराइँ गरेर हाल काठमाडौंमा बस्दै आएका कृष्णबहादुर बोहराको विभत्स हत्या गरी फरार भएको आरोपमा ती महिलालाई महानगरीय अपराध महाशाखाको टोलीले सोमबार पक्राउ गरी राति नै काठमाडौं ल्याएको हो ।

हत्या आरोपित महिलालाई थप प्रमाण संकलनका लागि अहिले घटनास्थलमा लगिएको छ । घटनास्थल नजिकैको एक घरमा भाडामा बस्दै आएकी उनले राति बोलाएर बोहराको खुकुरी प्रहार गरी हत्या गरेको स्वीकार गरेको प्रहरी श्रोतले जनाएको छ ।  महिलाले हत्यामा प्रयोग गरेको खुकुरी पनि बरामद गरेको छ ।

महिलाको कोठाबाटै प्रहरीले मृतक बोहराले लगाउने कपडासमेत फेला पारेको स्रोतले बतायो । प्रहरीले अहिले आरोपित महिलालाई घटनास्थलमा लगेर थप प्रमाण बुझ्ने कार्य शुरु गरेका ेछ । प्रहरीले हत्यामा अरु पनि संलग्न भएको आंशका गरेर अनुसन्धान गरिरहेको जनाएको छ ।