संविधान संसोधन विधेयकमा संसोधन राख्न ७२ घण्टे समय दिइने

काठमाडौं । नेपालको अध्यावधिक गरिएको राजनीतिक तथा प्रशासनिक नक्सालाई संविधानको अनुसूचि ३ मा रहेको निशान छापमा संसोधन गर्न संसदमा आज देखि सैद्धान्तिक छलफल शुरु हुदैछ । जेठ ९ मा सरकारले संविधान संसोधनको प्रस्ताव संसदमा दर्ता गराएको थियो । राष्ट्रिय अखण्डता र सार्वभौमिकताको विषयसँग जोडिएको यो संसोधनमा सरकारले राष्ट्रिय सहमतिको खोजीका लागि १३ जेठमा सर्वदलीय बैठक बोलाएको थियो ।

बैठकमा प्रधानमन्त्री ओलीले राष्ट्रियताका विषयमा पक्ष विपक्षमा कोही नजानेमा आफु विस्वस्त रहेको भन्दै सर्वसम्मतीका साथ एकमतका रुपमा प्रस्तुत हुन अपिल गरेका थिए । त्यसपछि काँग्रेसले केन्द्रीय समितिबाट निर्णय लिने भन्दै समय माग्यो, मधेस केन्द्रीत दलले आफ्ना मागलाई पनि प्याकेजमै राखेर एकैपटक संविधान संसोधन गरेर जान प्रधानमन्त्रीसँग आग्रह गरे ।

त्यसपछि ओलीले काँग्रेसलाई छिटो निर्णय लिन भने, मधेस केन्द्रीत दललाई राष्ट्रियताको विषयमा अन्य विषय नजोडन आग्रह गरे । काँग्रेसले अहिले सरकारको प्रस्तावमा मतदान गर्ने निर्णय गरिसकेको छ । यसबीच दलहरुले गैर सरकारी विधेयकका रुपमा संविधान संसोधनका थप प्रस्तावहरु पनि संसदमा दर्ता भएको छ । काँग्रेसका मधेस केन्द्रीत सात जना सांसद, जनता समाजवादी पार्टी, नेमकिपा र राष्ट्रिय जनमोर्चाका सांसदहरुले गैर सरकारी विधेयकका रुपमा संविधान संसोधनका आ–आफना पार्टीले उठाउदै आएको मागलाई समेटेर प्रस्ताव संसदमा दर्ता गराएका छन् ।

पार्टीका सांसदहरुले दर्ता गराएको गै¥ह सरकारी विधेयकका विषयमा अहिले संसदमा छलफल अगाडी बढाईहाल्ने अवस्थामा सरकार छैन् । तर सरकारले पेश गरेको संसोधन प्रस्ताव जेठ १८ गते संसदमा पेश भएको थियो । त्यसमा आजै संसदमा सैद्धान्तिक छलफल गर्ने कार्यसूचि राखिएको छ । बजेट पारित गरेपछि सैद्धान्तिक छलफल प्रारम्भ गर्ने गरी कार्यसूचि बनाईएको हो । सत्तापक्षले दलहरुले आ–आफना संविधान संसोधन प्रस्ताव राखिसेको कारण फाष्ट ट्रयाकबाट संसदको नियमावली निलम्वन गरेर संविधान संसोधन गर्न काँग्रेस लगायतसँग प्रस्ताव गरेको थियो ।

कार्यव्यवस्था परामर्श समितिको बैठकमा नेकपाले राखेको यो प्रस्तावमा काँग्रेसले छोटो प्रक्रियाबाट अगाडी बढन तयार भएपनि संविधान संसोधन प्रस्तावमा संसोधन राख्न पाउने ७२ घण्टाको समयमा भने नियमावली निलम्बनमा सहमति जनाएन् ।

त्यसपछि अब सैद्धान्तिक छलफल पछि संविधान संसोधनको प्रस्तावमा संसोधन हाल्नका लागि ७२ घण्टाको समय दिने गरी प्रक्रिया अलिक लम्बिएको छ । अब ४, ५ दिन यसले लिने देखिएको छ । त्यसपछि मात्र संविधान संसोधन विधेयक संसदबाट पारित हुने भएको छ ।