तन्दुरुस्तीको लय समात्दै प्रधानमन्त्री ओली

काठमाडौं । एपेण्डिसाइटिसको शल्यक्रिया र हेमाडाइलाइसिसपछि प्रधानमन्त्री केपी शर्मा ओली तन्दुरुस्तीको लय समात्ने प्रयासमा जुटेका छन् ।
बिहीबार बिहानदेखि हिँड्न सक्ने अवस्थामा पुगेका प्रधानमन्त्री ओली बिहानै उभिएर बाहिरतिर टहलिन खोजेपछि चिकित्सक हैरानीमा परे । उनीहरुले प्रधानमन्त्रीलाई आराम गर्न र हिँडडुल नगर्न सम्झाउनु परेको उपचारमा संलग्न टिमका एक सदस्यले बताए ।
बुधबारै अक्सिजन मास्क कहिले निकाल्ने हो भन्दै चिकित्सकलाई सोधेका प्रधानमन्त्री ओलीले आफू पूर्ववत् अवस्थामा फर्किसकेको जनाऊ दिन कुनै कसर बाँकी राखेका छैनन् । उनी चाँडोभन्दा चाँडो नियमित काममा फर्किन चिकित्सक र सहयोगीहरुसँग तन्दुरुस्तीको प्रमाण पेश गर्न आफ्नो लयमा आउने प्रयासमा छन् ।
बुधवार कालो चिया पिएका प्रधानमन्त्रीले बिहीबार बिहानै दाल पिएको अस्पताल स्रोतले जनाएको छ । प्रधानमन्त्री आफ्नो पूर्वववत स्वभाव अनुसार हाँसो ठट्टा गर्ने अवस्थामा फर्किसकेको उनलाई भेट्नेहरुले बताएका छन् ।