टेलिप्रिजेन्समार्फत क्याविनेट चलाएकोमा पार्टी भित्रै ओलीको आलोचना

काठमाडौं । प्रधानमन्त्री केपी ओली यतिबेला उपचारका सिलसिलामा सिंगापुरमा छन् । सिंगापुर जानु अघिल्लो दिन मात्रै उनले कार्यसम्पादन नियमावली २०६४ लाई संसोधन गरेर भिडियो कन्फरेन्समार्फत पनि मन्त्रिपरिषदको बैठक बस्न सकिने कार्यविधि संसोधन गराए ।

कार्यवाहक प्रधानमन्त्री उनले उपप्रधान तथा रक्षामन्त्री इश्वर पाखेरेललाई जिम्मा दिए । तर मन्त्रिपरिषद बैठकको अध्यक्षता गर्न उनले दिएका छैनन् । आफै सिंगापुरबाटै मन्त्रिपरिषद बैठक टेलिप्रिजेन्समार्फत चलाए ।

देश बाहिर रहेर क्याविनेट बैठक भिडियो कन्फरेन्समार्फत चलाउदा देशको गोपनियताका विषयमा प्रतिपक्षी कांग्रेस देखि आफ्नै पार्टीको प्रखर आलोचक मानिएका भीम रावलसम्म कडकिए ।

अहिले त्यो बैठक मन्त्रिपरिषदको थियो, थिएन भन्ने वहस नेकपाभित्र चल्न थालेको छ । प्रधानमन्त्री स्वयंले उक्त बैठकलाई मन्त्रिपरिषद्को बैठक भनेका छन् । प्रधानमन्त्रीकै सामाजिक सन्जालमा उक्त वैठकका तीन ओटा तस्वीर राखेर प्रविधि र प्राविधिकलाई धन्यवाद दिन चाहान्छु । आज पहिलो चोटी सिंगापुरबाट टेलिप्रिजेन्स मार्फत मन्त्रिपरिषद्को बैठक बस्न सकियो । मन्त्रिपरिषद्का सवै सहभागी साथीहरुलाई धन्यवाद । प्रधानमन्त्री तथा मन्त्रिपरिषद् सचिवालयका सवै सहयोगीहरुलाई धन्यवाद । भन्दै पोष्ट गरिएको थियो । उनका प्रमुख राजनीतिक सल्लाहकारले पनि सिंगापुरदेखि काठमाडौं भन्दै पहिलोपटक टेलिकन्फेन्समार्फत मन्त्रिपरिषद बैठक भनेर पोष्ट गरेका थिए ।

त्यसपछि यसको निक्कै आलोचना हुन थालेको छ । राष्टिय हितको सुरक्षाका लागि प्रश्न उठाउदै प्रतिपक्षी देखि आफ्नै पार्टी नेताहरुको तारोमा प्रधानमन्त्री पर्न थालेका छन् ।

त्यसपछि अहिले यो मन्त्रिपरिषद्को बैठक नै होइन भन्दै ओली निकट नेताहरु बचाउमा लाग्न थालेका छन् ।

ओली निकट नेता तथा नेकपाका महासचिव विष्णु पौडेलले यो विषयमा सही सूचना सम्प्रेषण नभएको आफुले पाएको प्रतिक्रिया दिएका छन् । सफल खबरसँग कुरा गर्दै उनले तीन दिन अगाडी सिंगापुरबाट चलाएको बैठक क्याविनेट बैठक नै नभएको बताए ।

‘यो विषयमा सही सूचना सम्प्रेषण नभएको हो की झै लाग्छ । त्यो त मन्त्रिपरिषद्को बैठक नभएर प्रधानमन्त्री, कार्यवाहक प्रधानमन्त्री र मन्त्रीहरुको भिडियो सम्वाद थियो । प्रधानमन्त्रीले मन्त्रीहरुसँग अपडेट मात्र लिनुभएको हो । क्याविनेट वैठक नै भने होइन ।’