थाइल्याण्डमा मोदीसँग होला त ओलीको भेट ?

काठमाडौं । प्रधानमन्त्री केपी ओली यतिबेला थाइल्याण्डमा छन् । उनको यो भ्रमणको दुईवटा मक्सद छन् । पहिलो, थाइल्याण्डको औपचारिक भ्रमण । दोस्रो, बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिम्स्टेक) को छैटौं शिखर सम्मेलनमा सहभागीता ।

यही दुवै मेसो एकै चरणमा पूरा गर्ने गरी प्रधानमन्त्री ओली नेतृत्वको प्रतिनिधिमण्डल मंगलबार थाइल्याण्ड पुगेको छ । आज त्यहाँ प्रधानमन्त्री ओलीले थाइ समकक्षी पेतोङत्रान सिनावात्राबीच भेटवार्ता गदैछन् ।
थाइल्याण्डको सरकारी भवनमा भेटवार्ताअघि प्रधानमन्त्री ओली समकक्षी शिनावात्राले आयोजना गरेको स्वागत समारोहमा सहभागी भईसकेका छन् ।

नेपालले थाइल्याण्डसग कुटनीतिक सम्वन्ध कायम गरेको पैसाठी बर्षपछि नेपालको प्रधानमन्त्रीको तहमा ओलीको यो औपचारिक भ्रमण भएको हो । भ्रमणका क्रममा थाइल्यान्ड र नेपालविच पर्यटन सस्कृतिको सन्दर्भमा दुईवटा समझदारीपत्रमा हस्ताक्षर हुने बताइएको छ । यसका आलावा दुई देशका प्रधानमन्त्रीको उपस्थितीमै गरैसरकारी क्षेत्रका अन्य ६ वटा समझदारीपत्रमा समेत हस्ताक्षर हुने बताइएको छ ।

यो त भयो ओलीको थाइल्याण्न्डको भ्रमणभित्रको एउटा मक्सदका कुरा । उनको भ्रमणको अर्काे मक्सद भनेको बिमस्टेकको सम्मेलनमा सहभागिता जनाउनु हो । २२ चैतबाट विमस्टेक शिखर सम्मेलन थाइल्यान्डमै आयोजना हुँदैछ । उक्त शिखर सम्मेलनमा प्रधानमन्त्री ओलीले सहभागिता जनाउनेछन् । त्यहाँ भारत लगायतका देशका सरकार प्रमुखहरुको सहभागिता हुँदैछ ।

ओलीको भ्रमणका प्रष्ट खुलेका यी दुई मक्सदबाहेक अर्काे भित्री सवैभन्दा ठूलो मिसन भने भारतीय प्रधानमन्त्री नरेन्द्र मोदीसँगको भेट गर्नु रहेको छ । प्रधानमन्त्री ओली गत असार अन्तिम साता प्रधानमन्त्री भएयता अहिलेसम्म उनले आफुले चाहाना राख्दा पनि छिमेकी मुलुक भारतको औपचारिक भ्रमण गर्न पाएका छैनन ।
 
उनी आफनो भारत भ्रमणका लागि अनेक तरहले प्रयासरत छन् । प्रधानमन्त्री भएयता ओलीको मोदीसँग भेटै नभएको भने होइन । तर भेटवार्ता सौहार्द हुन सकिरहेको छैन । थाइल्यान्डको बैंककमा मोदीसँग ओलीको भेट बहुपक्षीय मञ्चमा दोस्रो भेटघाट हुनेछ। यसअघि ओली-मोदी दुवैले गत असोजमा न्यूयोर्कमा साइडलाइन वार्ता केही समयका लागि भएको थियो ।

उक्त भेट पनि भेटनका लागि मात्र भएको जस्तो भएको थियो । तर ओली अहिले बैंककमा मोदीसँगको भेटलाई सहजतामा लैजान चाहिरहेका छन् । तर त्यो सम्भाबना के कति रहन्छ ? अहिले नै भन्न सकिने अवस्था भने देखिएको छैन । नेपालमा हिन्दु राज्य र राजतन्त्र पूर्नस्थापनाको माग राखेर आन्दोलन बढ्न थालेको र त्यसमा भारतको उत्तर प्रदेशका मुख्यमन्त्री योगी आदित्यनाथ समेत जोडिएपछि झन् सम्वन्धमा खटपट देखिन खोजेको छ ।

यधपी, थाइल्यान्डमा पुगेका प्रधानमन्त्री ओलीका प्रतिनिधिमण्डलका सदस्यहरुले भने शुक्रबार मोदीसँग प्रधानमन्त्री ओलीको भेटवार्ता हुने जिकिर गरिरहेका छन् । साइडलाइन बार्ता शुक्रवार  मोदी  र प्रधानमन्त्री ओलीका बीचमा आधाघण्टका लागि हुने गरी तालिका मिलिसकेको दावी नेपाली प्रतिनिधिमण्डलले गरेको छ ।

शुक्रबार स्थानीय समयअनुसार साँझ ४ बजे आधा घण्टाको लागि  मोदी  र ओलीको  भेटघाट हुने गरी कार्यक्रम रहेको उनीहरुको भनाई छ । न्यूयोर्कमा भएको संयुक्त राष्ट्रसंघ महासभाको ७९ औं सत्रको क्रममा उनीहरूको अघिल्लो भेटघाट सौहार्द वातावरणमा हुन सकेको थिएन ।

नेपाली प्रतिनिधिमण्डलले शुक्रबारको भेटपछि भने ओलीको भारत भ्रमण हुनसक्ने आशा राखेको छ । यधपी त्यहाँ भेटवार्ता हुने नहुने र भेटले लिने मोड के हुने अहिले नै भन्न सकिने अवस्था भने देखिएको छैन ।

तनावपूर्ण राजनीतिक सम्बन्धका कारण न त ओलीले भारतको भ्रमण सुनिश्चित गर्न सकेका छन् न त भारतीय प्रधानमन्त्रीको नेपाल भ्रमणको व्यवस्था गर्न सकेका छन्। गत वर्ष भदौंमा मोदीसँगको भेटघाटमा परराष्ट्रमन्त्री आरजु राणा देउवाले भारतीय प्रधानमन्त्रीलाई नेपाल भ्रमणको निम्तो दिएका थिए। तर दुई भ्रमणहरू ( ओलीको भारत भ्रमण र मोदीको नेपाल भ्रमण ) दुवै साकार भएका छैनन्।