अमेरिका र क्यानडा पठाइदिन्छु भन्दै ठगी गर्ने दुई जना पक्राउ

काठमाडौँ । वैदेशिक रोजगारीमा आकर्षक तलबको प्रलोभनमा पारी अमेरिका र क्यानडा पठाइदिन्छु भन्दै रकम ठगी गरेको अभियोगमा दुई जना पक्राउ परेका छन् ।

पक्राउ पर्नेहरूमा सङ्खुवासभा मकालु गाउँपालिका घर भएका हाल काठमाडौँ बुढानिलकण्ठ नगरपालिका बस्ने २१ वर्षीय सालिकराम बानिया र मकवानपुर इन्द्रसरोवर गाउँपालिका घर भई हाल काठमाडौँ कीर्तिपुर नगरपालिका चौभारमा बस्दै आएको ३१ वर्षीया एलिना पुरी रहेका छन् ।

प्रहरीका अनुसार सालिकरामले अमेरिका पठाइदिन्छु भन्दै १ जना पीडितबाट ५ लाख रुपैयाँ र एलिनाले १ जना पीडितबाट १ लाख ५० हजार रुपैयाँ लिई सम्पर्कविहीन भएका थिए ।

उनीहरू सम्पर्कविहीन भएपछि पीडितहरूले दिएको उक्त उजुरीको आधारमा काठमाडौँ उपत्यका अपराध अनुसन्धान कार्यालय टेकुबाट खटिएको प्रहरीले उनीहरूलाई काठमाडौँ टेकुबाटै आइतबार पक्राउ गरेको हो ।

हाल पक्राउ परेका उनीहरूलाई आवश्यक अनुसन्धान तथा कारवाहीको लागि वैदेशिक रोजगार विभाग ताहाचाल काठमाडौँ पठाइएको छ ।