एचपीभी खोप लगाएका एक दर्जन बढी किशोरीहरू बेहोस

काठमाडौँ । पर्साको कालिकामाई गाउँपालिका–४ स्थित नेपाल राष्ट्रिय माध्यमिक विद्यालय कटिबलुवाका एक दर्जन बढी विद्यार्थीहरू अचानक बेहोस भएका छन् । 

उक्त विद्यालयमा अध्ययनरत एचपीभी खोप लगाएका १४ जना किशोरीहरू अचानक बेहोस भएको प्रधानाध्यापक इन्द्रदेव प्रसाद कुर्नीले जानकारी दिए । किशोरीहरूले केही दिन अघि एचपीभी खोप लगाएको कुर्नीले बताए ।

अभिभावकहरूले भने एचपीभी खोप लगाएका कारण छोरीहरू बेहोस भएको हुनसक्ने आशंका गरेका छन् । बेहोस भएका विद्यार्थीहरूलाई पोखरिया अस्पतालमा उपचारका लागि पठाइएको छ । तर उपचारमा संलग्न डक्टरहरूले भने एचपीभी खोप लगाएकै कारण उनीहरू बेहोस भएको पुष्टि भने गरेका छैनन् । 

प्रधानाध्यापक कुर्नीका अनुसार सोमबार बिहान विद्यालयमा प्रार्थना गरिरहेको बेला विद्यार्थीहरू एक्कासी बेहोस भएका हुन् । बेहोस हुनेमा एक जना किशोर पनि छन् ।  

विद्यार्थीहरूले अचानक टाउको दुख्ने, कमजोरी महसुस भएको बताएको र केही समयपछि एकाएक बेहोस भएर भुईँमा ढल्न थालेपछि उपचारका लागि पोखरिया अस्पतालमामा लगिएको कुर्नीले जानकारी दिए । 

बेहोस हुनुको कारण भने अहिलेसम्म खुल्न सकेको छैन ।