माओवादी अभियानमा प्रचण्ड आफै २१ जिल्ला पुग्ने

काठमाडौं । अबको पाँच दिनपछि नेकपा (माओवादी केन्द्र)ले २५ दिनसम्म जनतासँग माओवादी: तराई मधेस जागरण अभियान चलाउने भएको छ । पार्टी अध्यक्ष पुष्पकमलदाहाल प्रचण्डसहित पार्टीका बरिष्ठ उपाध्यक्ष, उपाध्यक्षहरु, महासचिव र उपमहासचिवहरुसहितका नेताहरुको उपस्थितीमा माओवादीले अभियान चलाउन लागेको हो ।

अभियान फागुन १२ मा झापाको कचनकबलको बनियानी देखि चैत ७ मा सूदुरपश्चिमको कञ्चनपुरसम्म चल्नेछ । यी अभियानका क्रममा पार्टी अध्यक्ष प्रचण्ड आफै देशका २१ जिल्लामा पुग्नेछन् । माओवादी केन्द्रको पौष २१ देखि २३ गतेसम्म चलेको पार्टी केन्द्रीय समितिको छैटौं बैठकले दुई चरणमा जनतासँग जोडिने गरी पार्टी अभियान चलाउने निर्णय गरेको थियो ।

त्यही निर्णयका आधारमा माओवादीले पहिलो चरणमा फागुन १२ मा झापाको कचनकबलवाट जनतासँग माओवादी तराई मधेस जागरण अभियान चलाउन लागेको हो ।
यो अभियान सकेपछि समिक्षा बैठक बस्ने र त्यसलगत्तै फेरि बैशाखमा मध्यपहाडी लोकमार्ग केन्द्रीत पूर्व पश्चिम जागरण अभियान चलाउने छ ।

तराई मधेस जागरण अभियानका क्रममा प्रचण्ड फागुन १२ गते झापा, १३ गते मोरङ, १५ गते सुनसरी जानेछन् । फागुन १४ मा भने शिवरात्री पर्ने भएकोले उक्त दिन भने माओवादीले अभियान चलाउने छैन ।त्यसैगरी फागुन १६ मा प्रचण्ड सप्तरी, १७ गते सिराहा, १८ गते धनुषा र १९ गते महोत्तरी पुग्नेछन् ।

फागुन २० मा भने प्रचण्ड पार्टीको थारु राष्टिय मुक्ति मोर्चाको सम्मेलनको उद्घाटनका लागि कैलली पुग्नेछने । त्यसपछि फेरि मधेस नै फर्केर २१ फागुन देखि पार्टी अभियानमै जोडिनेछन् । २१ फागुनमा उनी सर्लाही, २२ फागुमा रौतहट, २३ फागुनमा बारा र २४ फागुनमा पर्सामा आयोजना गरिने जनतासँग माओवादी अभियानको नेतृत्व नै प्रचण्डले गर्ने माओवादी नेताहरुले बताएका छन् ।

त्यसपछि भने प्रचण्ड फागुन २५ गते बागमती प्रदेशको चितवनमाआयोजना हुने कार्यक्रममा सहभागी हुनेछन् । २६ फागुनमा गण्डकीको नवरलपुर, २७ फागुनमा परासीमा चल्ने अभियानमा जोडिनेछन् । फागुन २८ गते भने प्रचण्डले बुटवलमा आयोजना हुने मगर मोर्चाको सम्मेलनको उद्घाटन कार्यक्रममा जोडिनेछन् ।

फागुन २९ र चैत १ गते होली पर्व परेकोले माओवादीले अभियानलाई विश्राम दिनेछ । त्यसपछि फेरि चैत २ गते कपिलवस्तु, चैत ३ मा दाङ, चैत ४ मा बाँके, चै ५ मा बर्दियामा अभियान चलाउने छ । त्यसपछि भने चैत ६ गते कैलाली र चैत ७ गते अभियानको पहिलो चरणको अन्तिम समापन कार्यक्रम कञ्चनपुरमा आयोजना गर्ने कार्यतालिका माओवादीले बनाएको छ । यी सबै अभियानको नेतृत्व प्रचण्ड आफैले गर्नेछन् ।

अभियानका क्रममा जनसभा, चोकसभा, अन्र्तक्रिया, जभेटघाट लगायतका कार्यक्रम आयोजना हुने माओवादीले बताएको छ । कार्यक्रम विहान, दिउँसो र बेलुका गरी बढीमा तीन स्थानमा आयोजना गरिने माओवादी केन्द्रका महासचिव देवप्रसाद गुरुङले जानकारी दिए ।