शेख हसिनालाई सामाजिक सञ्जाल प्रयोग गर्न नदिन भारतसँग बंगलादेशको अनुरोध

एजेन्सी । बंगलादेशकी पूर्वप्रधानमन्त्री शेख हसिना ६ महिनादेखि भारतको शरणमा छिन्।

यसैबीच बंगलादेशले शेख हसिनाले सामाजिक सञ्जाल प्रयोग गरिरहेकामा भारत सरकारसँग कडा विरोध जनाएको छ।

यस सम्बन्धमा बंगलादेशको विदेश मन्त्रालयले सामाजिक सञ्जाल फेसबुकमा विज्ञप्ति जारी गरेको छ।

पोस्टमा भनिएको छ, ‘बंगलादेशको विदेश मन्त्रालयले पूर्वप्रधानमन्त्री शेख हसिनाले सामाजिक सञ्जाललगायत विभिन्न प्लेटफर्ममा लगातार दिइरहेका झुटा र बनावटी टिप्पणी र अभिव्यक्तिबारे भारत सरकारसँग कडा विरोध जनाएको छ, जसले बंगलादेशमा अस्थिरता निम्त्याइरहेको छ।’

‘ढाकास्थित भारतका कार्यवाहक उच्चायुक्तलाई हस्तान्तरण गरिएको विरोध पत्रमार्फत मन्त्रालयले बंगलादेश सरकारको गहिरो चिन्ता, निराशा र गम्भीर आपत्ति व्यक्त गरेको छ, किनकि यस्ता अभिव्यक्तिले बंगलादेशका जनताको भावनामा चोट पुर्‍याइरहेका छन्।’

विज्ञप्तिमा भनिएको छ, ‘शेख हसिनाको यस्तो कार्यलाई बंगलादेशप्रति शत्रुतापूर्ण कार्य मानिन्छ र दुई देशबीचको राम्रो सम्बन्ध स्थापित गर्ने प्रयासका लागि लाभदायक हुँदैन।’

विज्ञप्तिमा थप भनिएको छ, ‘विदेश मन्त्रालयले भारत सरकारलाई पारस्परिक सम्मान र समझदारीको हितमा छिटोभन्दा छिटो उचित कदम चाल्न अनुरोध गरेको छ ताकि भारतमा रहँदा सामाजिक सञ्जाल र सञ्चारका अन्य माध्यमहरू प्रयोग गरेर शेख हसिनालाई झुटा, बनावटी र उत्तेजक बयान दिनबाट रोक्न सकियोस्।’