चितवनको कृषि विश्वविद्यालयमा ३ डीन नियुक्त

चितवन । चितवनको कृषि तथा वन विज्ञान विश्वविद्यालयमा तीन वटा संकायमा डीन नियुक्त गरिएको छ । विश्वविद्यालय कार्यकारी परिषद्ले कृषि संकायको डीनमा प्रा.डा. अर्जुनकुमार श्रेष्ठ, पशु विज्ञान, पशु चिकित्सा तथा मत्स्य विज्ञान संकायको डीनमा प्रा.डा. भूमिनन्द देवकोटा र वन संकायको डीनमा प्राध्यापक बासु पोखरेललाई नियुक्त गरेको छ ।

यस्तै विश्वविद्यालयको अनुसन्धान तथा प्रसार निर्देशनालयको निर्देशकमा प्रा.डा.निराजन भट्टराई नियुक्त भएका छन् ।कृषि संकायका डीन श्रेष्ठ यसअघि सोही संकायका डीन थिए भने पशु संकायका डीन देवकोटा स्नातकोत्तर कार्यक्रम निर्देशक थिए । वन संकायका डीन पोखरेल यसअघि नै सहायक डीन भएर कार्य गरिसकेका व्यक्ति हुन् ।

अनुसन्धान तथा प्रसार निर्देशनालयका निर्देशक डा. भट्टराईले यसअघि निरन्तर शिक्षा केन्द्रका निर्देशक भएर काम गरिसकेका थिए । विश्वविद्यालय उपकुलपति प्रा.डा. शारदा थपलियाले राज्यका लागि आवश्यक दक्ष जनशक्ति उत्पादन गर्नुपर्ने मुख्य कार्यभार विश्वविद्यालयसँग रहेको भन्दै त्यसबाट विचलित नभई काम गर्न डिन तथा निर्देशकलाई निर्देशन दिइन् । विश्वविद्यालयमा शैक्षिक वातावरण बनाउन सबैको सहयोग उत्तिकै आवश्यक रहेको पनि उनले बताइन् ।

यसैगरी रजिष्ट्रार प्रा.डा. पुष्कर पालले नियुक्त भएका डीन तथा निर्देशकहरुले विश्वविद्यालयको समग्र शैक्षिक गतिविधिमा आ–आफ्नो ठाउँबाट उत्कृष्ट कार्य गर्ने विश्वास व्यक्त गरे । विश्वविद्यालय एक पोखरी जस्तै भएको भन्दै उनले त्यसको डीलमा बसेर सधैं पोखरी फोहोर भयो भन्ने छुट कसैलाई पनि नभएको बताए ।