राष्ट्रिय मानव अधिकार आयोग ऐन संशोधन विधेयक सरकारले नै रोकेको गुनासो

काठमाडौं । राष्ट्रिय मानव अधिकार आयोग ऐन संशोधन विधेयक सरकारले नै रोकेको गुनासो आयोगले गरेको छ । शुक्रबार प्रतिनिधिसभा अन्तर्गतको कानुन न्याय तथा मानवअधिकार समितिको बैठकमा आयोगका अध्यक्ष तपबहादुर मगरले यस्तो गुनासो गरेका हुन् ।

अध्यक्ष मगरका अनुसार आयोगको अन्तर्राष्ट्रिय श्रेणी घटुवासम्मको विषय आएको र आयोगका सिफारिस कार्यान्वयन लगायत समयानुकूल संशोधन गर्ने गरी विधेयक तयार दिइएको छ ।

‘तर विधेयक मन्त्रिपरिषद्‍बाट अगाडि बढ्न सकेन । मन्त्रिपरिषद्‍मै अड्किएको छ,’ अध्यक्ष मगरले भने, ‘ऐन संशोधन नहुँदा काम गर्न अप्ठ्यारो भइरहेको छ ।’

अध्यक्ष मगरका अनुसार आयोगले विधेयक अगाडि बढाउन ताकेता पनि गरिरहेको छ । उनले दोहोर्‍याए, ‘३/४ महिना भयो विधेयक बनाएर पठाएको तर अगाडि बढेन।’