शीतल निवासमा मेलम्चीको पानी आपूर्ति नियमित नभएको विषयमा राष्ट्रपति पौडेलको चासो

काठमाडौँ । राष्ट्रपति रामचन्द्र पौडेलले  शीतल निवासमा मेलम्चीको पानी नियमित आपूर्ति नभएको विषयमा चासो व्यक्त गरेका छन् । सोमबार राष्ट्रपति कार्यालयमा आयोजित भेटवार्ताका क्रममा उनले देशभरका खानेपानी आयोजना, विशेष गरी तनहुँका आयोजनाहरूको अवस्थाबारे समेत जानकारी लिएका हुन् । 

राष्ट्रपति पौडेलले मेलम्ची परियोजना देशकै ठूला आयोजनामध्ये एक भए पनि यसको नियमित आपूर्तिमा देखिएको समस्याप्रति चिन्ता व्यक्त गरे । उनले मेलम्चीको पानी नियमित आपूर्ति नहुनु शीतल निवास मात्र नभई राजधानीका धेरै क्षेत्रका बासिन्दाका लागि समेत खानेपानी अभावको कारण बनेको बताए । 

राष्ट्रपति कार्यालय शीतल निवासमा आयोजित उक्त भेटवार्तामा खानेपानी तथा ढल व्यवस्थापन विभागका महानिर्देशक ई. रामकुमार श्रेष्ठ र उपमहानिर्देशक रामचन्द्र काफ्ले सहभागी रहेका थिए । भेटका क्रममा राष्ट्रपति पौडेलले संविधानले मौलिक हकका रूपमा परिभाषित गरेको खानेपानी तथा सरसफाइ सेवा नागरिकको आधारभूत आवश्यकता भएकाले यसको प्रभावकारी कार्यान्वयनको अवस्था बारे चासो राखेका थिए ।