पैसा बचाउन पूर्व राष्ट्रपतिको सुरक्षामा कटौती गर्दै श्रीलंका

कोलम्बो । पैसा बचाउन श्रीलंका सरकारले महत्त्वपूर्ण कदम उठाएको छ । पूर्व राष्ट्रपतिहरूलाई प्रदान गरिँदै आएको अत्यधिक व्यक्तिगत सुरक्षामा कटौती गर्ने निर्णय सरकारले गरेको छ ।

सरकारले जनवरी १ देखि पूर्व राष्ट्रपतिलाई दिइने सुरक्षाकर्मीको संख्या घटाउने घोषणा गरेको हो । सरकारको उद्देश्य सम्पूर्ण देशको सुरक्षा सुनिश्चित गर्नु भएको श्रीलंकाका मन्त्री आनन्द विजेपालाले मंगलबार बताए । यो निर्णय सरकारको नीति अनुरूप भएको पनि बताइएको छ ।

सार्वजनिक क्षेत्रका उच्च पदमा बस्नेहरूलाई पनि सर्वसाधारण नागरिक सरह सुविधा दिने वाचा आफूहरूले देशसँग गरेको विजेपालाले बताएका छन् ।

सन् २०२४ मा पूर्वराष्ट्रपतिहरूको सुरक्षामा मात्रै श्रीलंकाले १४४ करोड ८० लाख स्थानीय रकम खर्च गरेको थियो । अहिलेको कठिन समयमा यो जनतामाथि बोझ भएको विजेपालाको भनाइ छ ।

पूर्व राष्ट्रपति महिन्दा राजापाक्षेको खर्च सबैभन्दा बढी छ । राजापाक्षको सुरक्षामा मात्रै राज्यले वार्षिक ३२ करोड ६० लाख खर्च गर्दै आएको छ । अब भने सबै पूर्वराष्ट्रपतिलाई ६० जना मात्रै प्रहरी उपलब्ध गराइने समाचारमा उल्लेख छ ।