विमानस्थलमा कुकुर दौडिएपछि श्री एयरको जहाज ‘ओभर सुट’

काठमाडौँ । सुर्खेत विमानस्थलको रनवे (धावनमार्ग) मा कुकुर दौडिएपछि काठमाडौँबाट गएको श्री एयरको जहाजले ‘ओभर सुट’ गरेको छ ।

काठमाडौँबाट सोमबार मध्यान्ह उडेको श्री एयरको कलसाइन ९एन१२२ को जहाज सुर्खेत विमानस्थलमा अवतरण हुनै लाग्दा केही बेरअघि ओभर सुट गरेको हो । दिउँसो सवा १ बजे अवतरणका लागि तम्तयार भएर एयरपोर्ट क्षेत्रमा जहाज पसिसकेको अवस्थामा रनवेमा कुकुर दौडिन थालेको थियो ।

रनवेमा कुकुर दौडिएपछि अवतरण गर्न लागेको श्री एयरको जहाजले ओभर सुट गरेर सम्भावित दुर्घटना टार्न सफल भएको विमानस्थल स्रोतले जनाएको छ । उक्त जहाजले छिन्चुको आकाशमा तीन फन्का लगाएपछि अहिले सुर्खेत विमानस्थलमै अवतरण गरेको छ।