विकासमा राजनीति नगरौं: गृहमन्त्री लेखक

काठमाडौं। गृहमन्त्री रमेश लेखकले विकासमा राजनीति गर्न नहुने बताएका छन् । बुधबार कञ्चनपुरको कृष्णपुर नगरपालिकाले आयोजना गरेको स्वागत कार्यक्रममा बोल्दै गृहमन्त्री लेखकले कसैले पनि विकासमा राजनीति गर्न नहुने बताएका हुन् ।

'चुनाव लड्दा हामी आ–आफ्नो पार्टीको झण्डा लिएर जान्छौं', गृहमन्त्री लेखकले भने, 'चुनाव जितिसकेपछि विकासको मुद्दामा सबै मिलेर अगाडि बढ्नुपर्छ ।'गृहमन्त्री लेखकले लोकतन्त्रको विकल्प अरु कुनै व्यवस्था हुन नसक्ने समेत बताए ।

'लोकतन्त्रमा जनताका अधिकारहरूको सुरक्षा गर्ने,स्वतन्त्रता प्रदान गर्ने जनताको व्यवस्था हो', गृहमन्त्री लेखकले थपे, 'त्यसैले अहिलेको शासन व्यवस्थालाई हामीले सुदृढ गर्दै लग्नुपर्छ। यसैमा जनताको विश्वास र भरोसा जगाउनु पर्छ । त्यसका लागि पनि स्थानीय सरकारको सबैभन्दा भूमिका महत्त्वपूर्ण छ ।'

उनले स्थानीय सरकारले  सहज ढंगले  जनतालाई सेवा प्रदान गर्नुपर्ने बताए । देशमा विधिको शासन कायम गर्न सरकार पूर्ण रूपले लागिरहेको पनि गृहमन्त्री लेखकको भनाइ छ । 'एकै महिनामा परिणाम आउँदैन । सरकारले गरेका कामको परिणाम आउन समय लाग्छ', गृहमन्त्री लेखकले भने, 'हामी अत्यन्तै मिहिनेतका साथ काम गरिराखेका छौं ।'