युद्ध र प्राकृतिक सङ्कटको सामना गर्न साझा नीति आवश्यक : उपेन्द्र यादव

काठमाडौँ । जनता समाजवादी पार्टी नेपालका अध्यक्ष उपेन्द्र यादवले पर्यावरण, युद्ध र प्राकृतिक सङ्कट आदिको सामना गर्न साझा नीति, कार्यक्रम र प्रतिबद्धता चाहिने बताएका छन् । फिलिपिन्सको मनिलामा प्रोग्रेसिभ एलाइन्स, अक्बायन सिटिजन्स एक्सन पार्टी र सोकडेम एसियाद्वारा संयुक्त रुपमा आयोजित कार्यक्रमलाई बुधवार सम्बोधन गर्दै अध्यक्ष यादवले सो कुरा बताएका हुन् ।

समाजवादी, लोकतन्त्रवादी र प्रगतिशीलहरूले सहयोग, भातृत्वको अभिवृद्धि गर्दै विविध खाले सङ्कट र विद्यमान असमानताको हल गर्न तत्काल कदम चाल्नुपर्नेमा अध्यक्ष यादवले जोड दिए । अध्यक्ष यादवले सामाजिक न्याय, मानव अधिकारको संरक्षणको हकमा विभेदमा पारिएका जनता नै सङ्कटको भुमरीमा पर्ने बताए ।

कार्यक्रममा विभिन्न २१ मुलुकका समाजवादी लोकतन्त्रवादी राजनीतिक दलका अध्यक्ष तथा प्रतिनिधि, सिनेटर, अन्तर्राष्ट्रिय सम्बन्ध विभाग प्रमुख लगायतको सहभागिता रहेको छ । अध्यक्ष यादव बिहीबार स्वदेश फर्किने कार्यक्रम रहेको बताइएको छ ।