डोटीमा एक महिला मृत अवस्थामा फेला

डोटी । डोटीको दिपायल सिलगढी नगरपालिका-७ पाकरीकी एक महिला मृत अवस्थामा फेला परेकी छन् । शनिवार बिहान करिब ११ बजेतिर घरबाट घाँस काट्न निस्केकी अन्दाजी ४८ वर्षीय चन्द्रा विष्ट हराएकी थिइन् ।

बिहानै निस्केकी चन्द्रा साँझ ७ बजेसम्म पनि घर नआएपछि आफन्तहरूले खोजी गर्न सुरु गरेका थिए । कहीँ कतै भेटाउन नसकेपछि राती ९ बजे प्रहरीलाई खबर गरिएको चन्द्राका आफन्तले जानकारी दिएका छन् ।

नेपाल प्रहरी र सशस्त्र प्रहरीको टोलीले चन्द्राको खोजी गरिरहेको थियो । आइतबार नेपाल प्रहरी र स्थानीय बासीहरूको टोलीले खोज्दै जाँदा घरबाट करिब आधा घण्टाको दुरीमा रहेको जङ्गलमा उनको शव घोप्टो परेको अवस्थामा भेटिएको उनका आफन्त हिक्मतवहादुर विष्टले जानकारी दिए ।