काठमाडौं। नेपाली कांग्रेससँग मिलेर सरकार बनाउने सहमति भएपछि अब कसरी अगाडि बढ्ने भन्ने रणनीति बनाउन नेकपा (एमाले)को सचिवालय बैठक बसिरहेको छ । बैठक च्यासलस्थित केन्द्रीय कार्यालयमा मंगलवार दिउँसो बसिरहेको हो ।
सोमवार राति दुई दलबीच एमाले अध्यक्ष केपी शर्मा ओली अबको दुई वर्ष प्रधानमन्त्री बन्ने समझदारी भएको छ । त्यसपछिको डेढ वर्ष कांग्रेस सभापति शेरबहादुर प्रधानमन्त्री बन्ने सहमति भएकाे छ ।
कांग्रेससँग सहमति भए पनि प्रधानमन्त्री पुष्पकमल दाहाल प्रचण्डले राजीनामा दिएका छैनन् । यसैले उनको सरकारमा सहभागी भएका आफ्ना मन्त्रीलाई फिर्ता बोलाउने कि प्रधानमन्त्रीको राजीनामा पर्खिने भन्नेबारे निर्णय लिन पनि एमालेको सचिवालय बैठक बसिरहेको हो ।
कांग्रेससँग सहमति भएपछि अध्यक्ष ओलीले मंगलवार बिहान प्रधानमन्त्री प्रचण्डसँग भेट गर्दै अर्को सरकारका लागि मार्गप्रशस्त गरिदिन आग्रह गरेका थिए । तर कांग्रेस र एमालेबीच कुनै लिखित सम्झौता भएको विषय सार्वजनिक नभएपछि प्रधानमन्त्री प्रचण्डले तत्काल राजीनामा दिनेभन्दा संसदमा विश्वासको मतको सामना गर्ने संकेत देखाएका छन् ।
नेकपा (माओवादी केन्द्र)को बैठकले पनि राजीनामा नदिइ विश्वासको मतको सामना गर्नुपर्ने निर्णय गरेको छ । तर दुई ठूला दल मिलिसकेकोले राजीनामा दिनुपर्ने मत पनि माओवादीमा रहेको छ ।
आफू नेतृत्वको सरकारबाट एमाले अपर्झट बाहिरिएर कांग्रेसतिर माेडिएपछि प्रचण्डले ओलीलाई सहजै संविधानको धारा ७६(२) अनुसार प्रधानमन्त्री बन्नबाट रोक्न सकिने विकल्प पनि हेरेका छन् । यसैले उनले राजीनामा दिइहाल्ने मानसिकता नबनाएको नेताहरू बताउँछन् ।
प्रतिक्रिया दिनुहोस
सफल खबर संवाददाता
मंगलबार, १८ असार २०८१, १६ : २६
लेखकबाट थप
सम्बन्धित समाचारहरु
च्यासलमा एमाले सचिवालय बैठक
एमाले सचिवालय बैठक बिहीबार बस्ने
एमाले सचिवालय बैठक स्थगित
एमालेले बोलायो सचिवालय बैठक
महाधिवेशन प्रतिनिधि परिषद्बारे छलफल गर्न एमालेले बोलायो सचिवालय बैठक
होलीको टीका लगाएर शुरू भयो एमाले सचिवालय बैठक