नेपालको खेलकुद पञ्चायतकालदेखि नै ट्रयाकबाहिर छ : भीम आचार्य

काठमाडौं। नेकपा एमालेका सांसद भीम आचार्यले नेपालको खेलकुद क्षेत्र पञ्चायतकालदेखि नै ट्रयाकबाहिर गएको बताएका छन् ।प्रतिनिधि सभाको बैठकमा बुधबार युवा तथा खेलकुद मन्त्रालयको बजेटमाथिको छलफलमा भाग लिँदै आचार्यले डि-ट्रयाक्ट भएको खेल क्षेत्रलाई ट्रयाकमा ल्याउनुपर्ने बताएका हुन् ।

‘डि-ट्रयाक्ट भएको खेल क्षेत्रलाई ट्रयाकमा ल्याउनुपर्छ । तर मन्त्रीले निराशाजनक रुपमा राजीनामा दिने कुरा गर्नुभयो । यसरी हरेस खाएर हुँदैन । समस्या समाधानमा लाग्नुपर्छ,’ आचार्यले भने, ‘खेलकुदमा पञ्चायतदेखि मनपरीतन्त्र थियो । शरदचन्द्र शाहको पालादेखिको समस्या हो  ।

पछिल्लो समय पनि धेरै अनियमितता र दुरुपयोगको विषय बाहिर आएका छन् । छानबिन गरेर दोषीलाई सजाय दिनुपर्छ ।’शिक्षाको विकास नभइ केही पनि विकास भन्दै उनले संरचनागत सुधारमा ध्यान दिन आवश्यक भएको बताए ।

‘शिक्षामा सामान्य सुधार गरेर पुग्दैन स्टन्टले पनि हुँदैन । संरचनागत सुधारको आवश्यकता छ,’ आचार्यले भने ।

खेलकुद क्षेत्रको विकासको लागि प्रत्येक प्रदेशमा एउटा खेल कलेज आवश्यक पर्ने उनले बताए । त्यस्तै, जिल्लादेखि विद्यालय तहसम्मै खेलका पूर्वाधार बनाउन सके खेलकुदमा निरन्तर फड्को मार्न सकिने उनले बताए । 

खेल क्षेत्रमा शिक्षण, प्रशिक्षण, राम्रा खेलाडी उत्पादन, पलायन रोक्ने, मोटिभेसनका कार्यक्रम ल्याउन अति नै आवश्यक भएको उनको भनाइ छ । 

सरकारले ल्याएको बजेटले बजेटले सन्तुलन कायम गराउन सकेको पन उनले बताए । ‘हामी सत्तामै भएकोले बजेट पास गर्छौं तर बजेटका विषयमा सरकार, मन्त्री सच्चिनुपर्छ,’ उनले भने ।