अनियमितता गर्ने कर्मचारीको मुद्दा लिएर म आफैँ अख्तियार जान्छु : स्वास्थ्यमन्त्री यादव

काठमाडौँ । प्रतिनिधि सभाको शिक्षा, स्वास्थ्य तथा सूचना प्रविधि समितिमा भएको छलफलमा स्वास्थ्य तथा जनसंख्यामन्त्री प्रदीप यादवले स्वास्थ्य मन्त्रालय प्राविधिक र संवेदनशील मन्त्रालय भएको बताउँदै संवेदनशील रूपमा नै काम गरिरहेको जानकारी गराएका छन् । उनले भने, ‘अहिले पनि मन्त्रालयबारे बुझ्ने क्रम जारी नै छ ।’

संघीय अस्पतालहरू धेरै छन् । जुन सोचका साथ अस्पताल स्थापना भएका हुन् त्यो अनुसार सेवा प्रवाह भइरहेको मैले पाएको छैन । अस्पतालहरूमा रहेका कमजोरीहरूको कसरी सुधार गर्न सकिन्छ भनेर मैले रातदिन काम गरिरहेको छु ।

सरकारी अस्पतालमा अप्रेसनको लागि बिरामीले समय पाइरहेका छैनन् । यसको लागि मैले समिति बनाएको छु । सम्भवत समितिले यही हप्ता रिपोर्ट दिन्छ । त्यो रिपोर्टको आधारमा मन्त्रालय अघि बढ्छ । कसको गल्ती हो ? के कारणले बेथिति भइरहेको छ ? सरकारी स्वास्थ्य संस्थामा जनतामाथि नै किन राजनीति भइरहेको छ ? यो विषयमा स्वास्थ्य मन्त्रालय गम्भीर छ ।