भोलि बस्ने राष्ट्रियसभाका यी हुन् आठ कार्यसूची

काठमाडौँ । आइतबारका लागि बोलाइएको राष्ट्रियसभाको बैठक बस्दै नबसी भोलि सोमबारका लागि सारिएको छ ।  भोलि दिउँसो १ः १५ बजे बस्ने बैठकका लागि सङ्घीय संसद् सचिवालयले सम्भावित आठ कार्यसूची तय गरेको छ ।

राष्ट्रियसभा अध्यक्षले राष्ट्रपतिको कार्यालयबाट प्राप्त मन्त्री तथा राज्यमन्त्रीको नियुक्ति तथा कार्यभारसम्बन्धी पत्रको ब्यहोरा जानकारी गराउने, प्रधानमन्त्री तथा मन्त्रिपरिषद्को कार्यालयबाट प्राप्त मन्त्रिपरिषद् सदस्यहरूको कार्यभार तोकिएको सम्बन्धी पत्रहरूको ब्यहोरा जानकारी गराउने कार्यसूची रहेको छ ।

यस्तै राष्ट्रियसभा अध्यक्षले विषयगत समितिमा सांसद सदस्यको नाम मनोनयन गर्ने, प्रधानमन्त्री पुष्पकमल दाहाल ‘प्रचण्ड’ ले गत जेठ १ गते राष्ट्रपतिबाट सङ्घीय संसद्को दुवै सदनको संयुक्त बैठकलाई भएको सम्बोधनको प्रति टेबुल गर्ने, राष्ट्रपतिलाई धन्यवादको प्रस्ताव प्रस्तुत गर्ने, उद्योग, वाणिज्य तथा आपूर्ति मन्त्री दामोदर भण्डारीले ‘लगानी सहजीकरण सम्बन्धी केही नेपाल ऐनलाई संशोधन गर्ने अध्यादेश, २०८१’ सभासमक्ष पेस गर्ने कार्यसूची रहेको छ ।

सञ्चार तथा सूचना प्रविधि मन्त्री रेखा शर्माले ‘मिडिया काउन्सिल विधेयक, २०८०’ सभा समक्ष पेस गर्ने, विधायन व्यवस्थापन समितिका सभापति जयन्ती देवी राईले “सुरक्षित कारोबार (पहिलो संशोधन) २०८०” सम्बन्धी विधायन व्यवस्थापन समितिको प्रतिवेदन सभासमक्ष पेस गर्ने सम्भावित कार्यसूची रहेको सङ्घीय संसद्का महासचिव पद्मप्रसाद पाण्डेयले जनाएका छन् ।