सहकारी प्रकरणसँगै कांग्रेसले गिरीबन्धु टी स्टेटको विषय उठाउने

काठमाडौं। नेपाली कांग्रेसले संसद्‌मा गिरीबन्धु टी स्टेटको विषयलाई उठाउने भएको छ । यसअघि सहकारीमा अरबौं ठगी भएको विषय उठाइरहेको कांग्रेसले अबदेखि गिरीबन्धु टी स्टेटको विषयलाई उठाउने कांग्रेसका प्रमुख सचेतक रमेश लेखकले जानकारी दिए ।

‘संसदीय दलको बैठकमा गिरीबन्धु टी स्टेटको विषय प्रवेश गरेको छ । यसको बारेमा पहिले भएका काम कुरा, सर्वोच्च अदालतबाट फैसला पनि भएको छ ।

यो विषयलाई सबै कोणबाट अध्ययन गरेर अर्को बैठकबाट धारणा सार्वजनिक गर्छौ', लेखकले भने, ‘आज विषयवस्तु दलको बैठकमा प्रवेश गरेको छ । अब थप सशक्त भएर प्रस्तुत हुन्छौं।’​

सिंहदरबारमा मंगलवार बसेको संसदीय दलको बैठकमा महामन्त्री गगन थापाले गिरीबन्धु टी स्टेटको विषय प्रवेश गराएका थिए ।

टी स्टेटको जग्गासम्बन्धी सर्वोच्च अदालतको फैसलालाई स्वागत गर्दै कांग्रेसले यस प्रकरणका अरु दोषीलाई कारबाही गर्ने विषय उठाउने जनाएको हो ।

टी स्टेटको जग्गा प्रकरणमा तत्कालीन सरकारका जिम्मेवार अधिकारी पनि संलग्न रहेको दाबी कांग्रेसको छ ।