एमाले ओखलढुंगाका अध्यक्ष कटुवालले दिए राजीनामा

काठमाडौं । नेकपा एमाले ओखलढुंगाका अध्यक्ष शंकर कटुवालले पदबाट राजीनामा दिएका छन् । गुट उपगुटका कारण जिल्ला अधिवेशनमा निर्णय गर्ने र प्रमाणीकरण गर्न पाउने आफ्नो अधिकार कुण्ठित भएको भन्दै उनले जिल्ला अध्यक्ष र पार्टी सदस्य दुवैबाट राजीनामा दिएका हुन् ।

जिल्ला इञ्चार्जमार्फत् प्रदेश कमिटी अध्यक्षलाई सम्बोधन गरिएको राजीनामा पत्रमा उनले लेखेका छन्, ‘मेरो झण्डै ३४ वर्षको राजनीतिक जीवन भोगाइमा यस्तो शैली मैले कहिले अनुभूत गरेको थिइनँ । मैले गरेको पार्टी योगदानको अर्थ र औचित्य नै नदेखेपछि जिल्ला अध्यक्ष र पार्टी सदस्य दुवैबाट राजीनामा पेस गरेको छु ।’

नेकपा एमाले ओखलढुंगाको दशौं जिल्ला अधिवेशन यही चैत २६ र २७ गते थियो । चैत २५ गते उदघाटनसत्र समापन भएपछि बन्दसत्र सुरु भएपछि गठन गरिएको अध्यक्ष मण्डलको अध्यक्ष पदमा उनी छन् ।

चैत २७ गते निर्वाचन समितिलाई प्रतिनिधिहरुको नाम टुंग्याई बुझाउने क्रममा र मतदाता नामावली प्रकाशन गर्ने चरणमा प्रवेश गरेपछि पार्टी सदस्य संख्या, सदस्यहरुको वैधानिक क्षेत्राधिकार र प्रतिनिधिहरुको वैधानिकतामा विवाद भएको थियो । त्यसमा चित्त नबुझेपछि अध्यक्ष कटुवालले राजीनामा दिएका हुन् ।