कोशी प्रदेश सरकारबाट माओवादी बाहिरियो, आजै राजीनामा बुझाउने

विराटनगर । नेकपा मओवादी संसदीय दल कोशीको बैठकले सरकारमा रहेका मन्त्रीहरुलाई फिर्ता बोलाउने निर्णय गरेको छ । बैठकपछि माओवादी संसदीय दलका नेता इन्द्र आङवोले आजै मन्त्रीहरुले राजीनामा दिने बताए । माओवादीका तर्फबाट सरकारमा ३ जना मन्त्री छन् ।

त्यस्तै नेकपा एमाले र नेकपा माओवादी केन्द्रले संयुक्त रुपमा कोशी सरकारलाई दिएको समर्थन फिर्ता लिने भएका छन् । कोशीका मुख्यमन्त्री केदार कार्कीलाई दिएको समर्थन आजै फिर्ता लिने दुई दलको तयारी छ ।

एमालेका प्रदेशसभा सदस्यले समर्थन फिर्ता लिन हस्ताक्षर गरिसकेका छन् । माओवादी संसदीय दलको अहिले बैठक बसिरहेको छ । बैठक सम्पन्न भएसँगै हस्ताक्षर गरेर समर्थन फिर्ता गरेको जानकारी संयुक्त रुपमा संसद सचिवालयमा गराउने तयारी भएको छ ।

नेकपा माओवादी नेता तथा कोशी प्रदेशसभा सदस्य दुर्गाप्रसाद चापागाईंले दुई दलबीच सरकारलाई दिएको समर्थन फिर्ता लिएर नयाँ सरकार गठनको प्रक्रिया अघि बढाउने सहमति भएको बताए ।

कार्की संविधानको धारा १६८ को उपधारा (५) अन्तर्गत कोशीको मुख्यमन्त्री बन्दा एमालेका ३९ प्रदेश सासंदले समर्थन गरेका थिए ।