गृहमन्त्रीमाथि छानबिन समिति बनाउनु पर्ने यथेष्ट तथ्य र प्रमाण भेटिएको छैनः प्रवक्ता शर्मा

काठमाडौं। सरकारकी प्रवक्ता एवं सूचना तथा सञ्चार प्रविधिमन्त्री रेखा शर्माले सहकारी ठगी प्रकरणमा मुछिएका उपप्रधान एवं गृहमन्त्री रवि लामिछाने सम्बन्धमा समिति बनाएरै छानबिन गर्नुपर्ने यथेष्ट प्रमाण फेला नपरेको बताएकी छिन् ।

लामिछानेमाथि लागेको आरोप सम्बन्धमा प्रधानमन्त्री पुष्पकमल दाहाल प्रचण्डले संसद् र स्वयं उनले संसदीय समितिमा कुरा राखिसकेको मन्त्री शर्माले बताइन् ।

सिंहदरबारमा बिहीवार बसेको मन्त्रिपरिषद् बैठकपछि पत्रकारले सोधेको एक प्रश्नको जवाफमा प्रवक्ता शर्माले संसदीय छानबिन बनाउने गरी प्रमाण फेल नपरेको बताएकी हुन् ।

‘गृहमन्त्रीको विषयमा प्रधानमन्त्रीले संसद्मा बोलिसक्नु भएको छ, संसदीय समितिमा उहाँ स्वयंले बोलिराख्नु भएको छ । यथेष्ट तथ्य प्रमाण संसदीय छानबिन समिति बनाएरै छानबिन गर्नुपर्ने देखिएको छैन,’ उनले भनिन् ।

सहकारीको पैसा अपचलनमा गृहमन्त्री लामिछाने संलग्न रहेको भन्दै प्रमुख प्रतिपक्षी दल नेपाली कांग्रेसले संसदीय छानबिन गर्न माग गरेको छ । चैत्र २७ गते बस्ने प्रतिनिधिसभा बैठकमा संसदीय छानबिन समितिको प्रस्ताव नल्याए संसद् अवरुद्ध गर्ने चेतावनी कांग्रेसले दिइसकेको छ ।