नवलपरासीको स्थानीय तहद्वारा पाठ्यपुस्तक निर्माण

नवलपरासी। नवलपरासी (बर्दघाट सुस्तापूर्व)को विनयी त्रिवेणी गाउँपालिकाले स्थानीय पाठ्यक्रमअनुरुप कक्षा १ देखि ५ सम्मको पाठ्यपुस्तक निर्माण गरेको छ ।विद्यार्थीलाई गाउँपालिकाको समग्र अवस्थाका बारेमा जानकारी गराउने गरी गाउँपालिकाभित्रका सामुदायिक र संस्थागत विद्यालयको कक्षा १ देखि ५ सम्मका लागि स्थानीय पाठ्यपुस्तक निर्माण गरिएको हो । गाउँपालिकाले आधारभूत तह १–८ लागि ‘हाम्रो विनयी त्रिवेणी’ नामको पाठ्यक्रम निर्माण गरेको गाउँपालिका अध्यक्ष घनश्याम गिरीले बताउनुभयो ।

“विद्यार्थीलाई कक्षागत आधारमा स्थानीय पाठ्यक्रममा विभिन्न विषय समावेश गरिएको छ”, उहाँले भन्नुभयो, “आधारभूत पाठ्यक्रममा गाउँपालिकाको समग्र अवस्था विद्यार्थीले सहजै पहिचान गर्न पाउनेछन् ।”गाउँपालिकाले हाल स्थानीय पाठ्यक्रमको कक्षा १ देखि ५ सम्मको पाठ्पुस्तकलाई छपाइका लागि पठाइसकेको छ । गाउँपालिकाभित्रका सबै विद्यालयमा पाठ्यपुस्तक एक हप्ताभित्रमा निःशुल्क उपलब्ध गराउने गरी तयारी गरिएको गाउँपालिकाका शिक्षा शाखा प्रमुख भूपराज पाण्डेले बताउनुभयो ।“पाठ्यक्रममा आधारित रहेर पाठ्यपुस्तक लेखन र छपाइको काम सकेर वैशाखभित्रमै विद्यालयमा कार्यान्वयनमा लगिने छ”, उहाँले भन्नुभयो । पाठ्यक्रमले तहगत सक्षमतासमेत तय गरेको छ । कक्षा १–३ ले गाउँ, वडा र पालिकाको परिचय, स्थानीय प्राकृतिक स्रोत तथा सम्पदा र पर्यटकीयस्थलको पहिचानलगायतका सक्षमता हासिल गर्ने पाठ्यक्रममा उल्लेख छ ।

पाठ्यक्रममा कक्षा ४ र ५ ले गाउँपालिकाको नक्साङ्कन, अवस्था पहिचानसँगै जीवनपयोगी सीपलगायतका सक्षमता हासिल गर्ने उल्लेख छ । कक्षा ६–८ ले गाउँपालिकाको इतिहासको जानकारी, गाउँपालिका गठन, सेवा प्रवाह, स्थानीय पर्यटन र व्यापारको सम्भावना अध्ययन गर्न सक्ने सक्षमता हासिल गर्न सक्ने पाठ्यक्रममा उल्लेख छ ।आफैँले देखेका, प्रयोग गरेका, दैनिकीसँग जोडिएका कुरा किताबमा समेटिँदा पढाइमा नयाँपन थपिएको जनता आधारभूत विद्यालयका प्रधानाध्यापक गणेशप्रसाद बस्यालले बताउनुभयो । उहाँका अनुसार स्थानीय पाठ्यक्रमअन्तर्गत वडा, स्थानीय सामाजिक संस्था र गाउँपालिकाको सामान्य जानकारी, विनयी त्रिवेणी गाउँपालिकाको भौगोलिक, सामाजिक र सांस्कृतिक अवस्थाका बारेमा जानकारी पढाइ हुने गरेको छ । विनयी त्रिवेणीभित्रका ४२ सामुदायिक र १२ संस्थागत विद्यालयमा स्थानीय पाठ्यक्रम लागू गरिएको छ ।