कर्णाली राजमार्ग मर्मत नहुँदा यात्रा भन्दा सास्ती धेरै

कर्णाली । दसैंलगत्तै बाढी पहिरोले भत्किएको सडक आवश्यक मर्मत नहुँदा कर्णाली राजमार्ग दुर्घटनाको कारक बन्ने देखिएको छ । सवारी साधन मात्र पास गराउनका लागि खोलिएको उक्त सडक अहिले जीर्ण बन्दै गएको छ ।

प्रायः राजमार्ग खाल्डाखुल्डी र धुलाम्मेका साथै साँघुरो हुँदा यातायातका साधनहरु सञ्चालन गर्न हैरान भएको यातायात व्यवसायी बताउँछन् ।  धुलोका कारण कर्णाली राजमार्ग अन्तर्गत सुर्खेतदेखि जुम्लासम्म यात्रा गर्नेहरू धुलोले चिन्न नसक्ने अवस्थामा पुग्ने गरेको यात्रु कालीबहादुर शाहीले बताए । 

कालिकोटको सेराबाडादेखी नाग्मसम्म २६ किलोमिटर सडक पहिरोले धुलाम्मे छ। कालिकोटको नाग्मदेखी गमगढीसम्म ९३ किलोमिटर सडकमा १८ किलोमिटरभित्र पहिरो गएको थियो । त्यस्तै कालिकोटको पिली, सेरीबाडा, भिक्म र बालीमा ठूलो पहिरो गएको थियो। त्यहाँ सडक नै बगाएका कारण नयाँ सडक खोलेर गाडी सञ्चालनमा ल्याइएको छ ।

दैलेख खण्डमा बर्सातमा गएको पहिरोले हिउँदमा कर्णाली राजमार्गको यात्रा गर्नेहरू साँगुरो र धुलाम्मे सडक हुँदै हिँड्नुपर्ने वाध्यता छ । त्रिदेशीय सडक भारत, नेपाल र तिब्बत (चिन) जोड्ने रणनीतिक सडक जमुनाह (बाँके) दैलेख महावु , कालिकोट, जुम्ला हुँदै मुगुको नाप्चेनाङ्गलासंगै चिन जोड्ने भन्दै सरकारले बर्सेनि बजेट भाषण गरेपनि काम हुन सकेको छैन । 
 
सडक डिभिजन कार्यालयले तत्कालका लागि सडक खुलाउने कार्य गरेपछि स्तर उन्नति लगायतका काम गर्न नसक्दा राजमार्गको अवस्था विजोग भएको भएको यात्रुको आरोप छ । बर्सातले तहसनहस पारेको कर्णाली राजमार्गलाई सरकारले विशेष बजेटसहित सडक सुधार गर्न पहल गर्न यस क्षेत्रका सांसदले समेत माग गर्दै आएका छन् । बर्सेनी कालिकोट, जुम्ला, मुगु, हुम्ला र पश्चिम दैलेखका स्थानीय चुपचाप सास्ती खेपेरै यात्रु गर्नुपर्ने वाध्यता रहेको हुम्ला सिमकोटका रामबहादुर फडेराले बताए । 

यहाँका नेता तथा माननीयहरूको राजमार्ग सुधारका लागि पहुँच नपुग्दा यात्रुहरूले ज्यानको जोखिम मोलिरहेको फडेराले आरोप लगाए । सडक डिभिजन कार्यालय सुर्खेत र जुम्लाबाट नियमित बजेट बाहेक थप बजेट व्यवस्थापन गरेको छैन। राजमार्गको अवस्था बिग्रँदा दुर्घटना जोखिम पनि उस्तै छ ।

सडक डिभिजन कार्यालय जुम्लाका प्रमुख राजीव श्रेष्ठले कालिकोट जुम्ला र मुगुसम्मको सडक सुधारका लागि काम भइरहेको बताए । ठूलो क्षति भएकाले सुधारका कामहरू भइरहे पनि तत्काल सडक स्तर उन्नतिका लागि गाह्रो हुने श्रेष्ठको भनाई छ। प्रायः कालिकोट र दैलेख खण्डमा सडक बिग्रेको छ ।