चिनियाँ भूमिमा आक्रमण गर्ने क्षेप्यास्त्रको खोजीमा जापान

काठमाडौं । जापान सरकारले आफूसँग रहेको जमीनबाट जहाजमा मार हान्ने टाइप १२ क्षेप्यास्त्रको दायरा कम्तीमा एक हजार किलोमिटर बढाउन चाहेको एक जापानी पत्रिकाले आइतवार खबर दिएको छ । 

उक्त क्षेप्यास्त्रलाई परिवर्तन गरेर जहाज तथा विमानबाट त्यसलाई प्रक्षेपण गर्ने र जमीनमा रहेका तारोमा प्रहार गराउने योजना पनि जापानले बनाएको छ । चीनसँग रहेको क्षेप्यास्त्र क्षमता अन्तरलाई यसरी जापानले कम गर्न खोजेको बताइएको छ । लामो दूरीको क्षेप्यास्त्र पाएमा जापानी टापुसमूहबाछ चिनियाँ मुख्यभूमिमा प्रहार गर्ने जापानको योजना हो । 

योमिउरी पत्रिकाका अनुसार, जमीनबाट मार हान्ने क्षेप्यास्त्र सन् २०२४ सम्ममा सेनामा राखिनेछ । टोक्योले यस्ता किसिममा थप एक हजार क्षेप्यास्त्रहरू नानसेई टापुसमूहमा राख्न खोजेको छ । ताइवान संकटका लागि ध्यानमा राख्दै जापानले यो कदम चाल्न खोजेको पत्रिका लेख्छ । गत डिसेम्बर महिनामा जापानी सेना सेल्फ डिफेन्स फोर्सेस र अमेरिकी सेनाबीच नानसेई टापुसमूहमा सैन्य आधारइलाका बनाउने सहमति भएको थियो । ताइवान र बेइजिङबीच युद्ध शुरू भएमा त्यस नयाँ आधारइलाकाको उपयोग गरिनेछ । 

आवश्यक परेको खण्डमा नानसेई टापुसमूहमा अमेरिकाका मरिन सैनिकहरू तैनाथ हुनेछन् । ताइवानमाथि सैन्य आक्रमण भएमा जापानी सेनाले आफ्ना सैनिकहरू अमेरिकी सेनालाई सघाउनका लागि राख्नेछ । नानसेई टापुसमूहमा लगभग २०० वटा साना टापु छन् । तीमध्ये केहीमा मानव बस्ती छैन ।