सांसद गिरिको निधनका कारण प्रतिनिधिसभा बैठक स्थगित

काठमाडौँ । प्रतिनिधिसभाको आइतबारको बैठक स्थगित भएको छ। आज दिउँसो १ बजेका लागि बोलाइएको बैठक‍ प्रतिनिधिसभा सदस्य प्रदीप गिरिको निधनका कारण स्थगित भएको सांसदले स्रोतले जानकारी दिएको छ।

स्रोतका अनुसार आज गिरिको श्रद्धाञ्जली र अन्त्येष्टिमा सहभागी हुनुपर्ने भएकाले नेपाली कांग्रेसको आग्रहमा प्रतिनिधिसभा बैठक सोमबार दिउँसो १ बजेसम्मका लागि स्थगित गरिएको हो। तर सोमबारको बैठक पनि शोक प्रस्ताव पारित गरेर स्थगित हुनेछ।

शनिबार राति ९:३० बजे ललितपुरस्थित नेपाल मेडिसिटी अस्पतालमा निधन भएका गिरि नेपाली कांग्रेसका नेता एवम् समाजवादी चिन्तकसमेत हुन्। कांग्रेसका एक नेताका अनुसार गिरिको पार्थिव शरीरलाई बिहान अस्पतालको शिवालय र पार्टी केन्द्रीय कार्यालय सानेपामा राखिनेछ र त्यसपछि पशुपतिमा अन्त्येष्टि गरिने कार्यक्रम तय भएको छ।